387. LÈVEN VOLTOOID?!

> Categorie: Literatuur Gepubliceerd: donderdag 13 oktober 2016

 

Veur mieneigen

-----

Een olde man veur de teevee:

“Mien lèven is voltooid!

Ik wil deruut, möör ik mag nieet!”

Het wier der uutegooid.

-----

Het lèven is net as een worst,

met een begin en ende;

döörtussen wördt het opevuld

met völ geluk en een boel ellende.

-----

Ens wördt het ende dichteknupt:

Het lèven is veurbie!

Der bint ter, diee wilt nog nieet dood,

möör anderen bint bliej.

Diee zekt: “Mien lèven is voltooid!

Ik wille nieet meer lèven!

En mocht ik nieet vanzelluf doodgoan,

oh, hellup mien dan èven!”

-----

Ik vroage: “Mien lèven hier voltooid?!

Ik bin toch nog nieet klöör!

Ik wil toch nog zoovölle doon!

Wat ik wil, dat kan nieet döör!”

Toch bin ik best tevrèden

oaver wat ik heb edoan.

En as mien worst wordt dichteknupt,

zal e döör bol van stoan!

-----

Mien werk wördt vast nieet vortegooid,

deur völlen nog bewaerd,

want een boel lèzers hebt al mien werk

hoast bie mekaer egaerd!

-----

En as mien asse wördt verstreujd

döör, wöör het lèven greujt en bleujt

döör uut de bèker wördt egooid

kui’j döör dan zeggen: “Lèven Voltooid?!”

-----

Crödde – Donderdag, 13 oktober 2016