386. SLOAPEN
- Grondwoord van sloapen dat is slap
of slof wat ’t zelde is as slaf
wiee slöp is kats ontspannen
höldt zich nieet stief of straf
-----
Wiee oaverdag mot sloapen
wiel e ’s nachts härd werken mut
slöp wat wiej neumt ’n Endymionssloap
umdat e ’t dagens dut
-----
Wiee deur het donker van de nacht
de hele märgen nog het licht nieet zag
sliep volgens een heel old gezegde
op zien gemak ’n gat in de dag
-----
Of iej diee dure eifoon kriegt
Ik helpe het oe hoapen
Oew vader zei: Döör mot ik eerst
Een nachtjen oaver sloapen
-----
De sjaffeur sliep met de ogen lös
ramden een andere wagen
De brandweer most de sufferd
uut de cabine zagen
-----
Iej könt sloapen as een reusken
en ook nog zelfs as een marmutjen
Iej könt ook sloapen as een osse
Ieder dut zien eigen dutjen
-----
Soms lik een bewaker zwöör te sloapen
Hee lig te snörken as een värken
möör dat diee schien lelijk bedrug
zult de inbrèkers wel märken
-----
Lèzer of heurder, ik mag hoapen
dat iej altied goed könt sloapen
En blieft oe de eugskes oapen
tel iej möör rustig oew eigen schoapen
----
Crödde – Woensdag, 12 oktober 2016
