377. Tuug van de richel

> Categorie: Literatuur Gepubliceerd: maandag 12 september 2016

An de Haagse Pärlementaire Politiek

-----

In Dèèmter neume wiej slecht volk

scheldend heel krachtig “tuug”.

De samenlèving hef zuk volk

zoo al vake uutespuugd!

Volgens “Dèventers Idioom”

bint ter “politiekelingen”

diee ook döörtoe beheurt,

zeker in Haagse kringen!

Zoo zei mien laatst een man

diee het zeker weten kon:

“Toe ‘k kamerlid döör wiere,

wis ‘k niee’ wööran ‘k begon.

Ik dachte toen dat ik

met hele beste luu van doon had.

Möör alles wat iej zekt of doot

dat lapt zee lachend an hun gat.

Ze maakten het mien zwöörder

as de zwöörste trottoirtichel.

Een antal scheldt anderen uut

as was ‘t “tuug van de richel”!”

-----

Heb ik onze premier gin

“tuig van de richel” heuren zeggen?

Wol hee döörmee wat Turkse jonges

‘scheldend!’ an banden leggen?

Hee proatten vleujend

en het kwam deruut as spuug.

Hee schaerden zich döörmee

bie hetzelde “richeltuug”!

Verleegden, vind ik, zich

töt ondermoatse taalverkrachting.

Ministerpresident,

U stiegt nieet in mien achting!

-----

Crödde van Niessel op moandag, 12 september 2016.