371. De Zogedistel

> Categorie: Literatuur Gepubliceerd: donderdag 28 juli 2016

Veur duurzaamheid van lèven

-----

As ik de peerdebloom ziee bleujen

lig ik weer in het zeumergrös

mes in de hand op beide knieeën

stèke de pinnen dieepe lös

-----

Wiej hadden toen vier vlaamse reuzen

Diee wieren deur ons veddemest

Met Kerst wieren ze dan egèten

Dat feestmoal smaakten opperbest

-----

Wiej sprakken nooit van peerdeblomen

Wiej keken toen nieet nöör de bleuj

Wiej dachten bie het distelstèken

enkeld an knienen en hun greuj

-----

Soms sprong het zog uut blad en wortel

As ik zoo an het stèken wäre

En ik veulden onder dat nuttig zwoegen

Het kump weer dikke veur mekäre

-----

Zogedistel is een mooie name

diee heurt bie duurzaam bezig wèzen

mocht iej nieet weten wat dat is

dan mo’j der möör es oaver lèzen

-----

Duurzame verbouw van produkten

De zogedistel steet model

net as een boel natuurprodukten

goeie verstoander snapt het wel

-----

Crödde – Donderdag, 28 juli 2016