367. DIEEF
Klein College
-----
‘Entupas’ dat is Grieks
en het beduudt ‘gehurkt’
Gehurkt deur het leven goan
joa, dat dut menig schurk
Uut ‘–tup-‘ kump ons woord ‘dieef’
wördt vake wel edacht
Het Litouws hef ‘tupeti’ ons
as ‘hurken’ inebracht
A’j op de hurken goat
dan kui’j heel goed wegduken
en ongemerkt en ongezieen
oaveral nöör binnen slupen
Ik denke dat hiermee het woord
‘dieef’ toch wel goed verklöörd is
wöörmee ik nieet wil zeggen
dat wa’k hier stell’ echt wöör is
Iej zit heel dieepe
as iej op de hurken goat
Iej bint dan minder zichtböör
as hoeneer iej rechtop stoat
‘Dieef’ hef met ‘dieepe’ dus
een hele sterke band
Ik denke zee bint an mekäre
toalkundig sterk verwant
Hoe of ik tertoo komme
hieroaver wat te melden
De keuning wier ‘een dieef’ eneumd
enkeld um hem uut te schelden
Zon scheldpertieje vind ik rot
‘k Vind dat gewoon nieet kunnen
‘k Mot ter gehurkt van op de pot
komme döörvan an de dunnen
Ik dach’: Toch heb ik ter wat an
‘k Make der een klein college van
-----
Pl. Crödde van Iessel – Donderdag, 7 juli 2016
