365. DÖPPEN
Veur alle 88-gers en older
-----
Nöör voetbal kieken dut e nauwelijks
ook nieet op de teevee
allewel hee trèner is ewest
bie het Dèèmters ‘de CeeJeeVee’
Döör heurt nog ‘- ers’ bie achteran
möör riemen mot het värs
en as het ongeriemd is
dan zit dat hem ärg dwärs
Het is ook heel ärg ongeriemd
dat het hem niks meer dut
dat disse kleine jonge dus
in voetbal niks meer zut
Hee beschouwt zien eigen noe
möör ens van buten of
Wöörumme had hee veur dat spel
as jonge zon boel lof
Döppen was toen gewoon een spölleken
en elk pertietjen in de gemeentewei
was altied weer een lölleken
Ze hadden nog gin döppers
want diee wazzen völs te duur
Vloag oe de kappe van de klompe
dan was iej ook nog zuur
Een koarner diee wier nieet enommen
driee koarners was een pengel
Vloag de balle es den Iesselt in
dan namme ze een hengel
of visgärde zoo diee ook heet
möör dat riemt nieet op pengel
Het is möör da’j het weet
En zoo gebruk e steeds
de talen deur mekäre
Geboren an den Iessel
Is hee zon halve garen
En as e noe nöör voetbal kik
EeKaa, WeeKaa, of zoo
krig e spontaan een reuze tik
en mot e op de poo
’t Is echt oorlog en gin spölleken
Hee zol d’r nooit meer an beginnen
Het geet nieet um het lölleken
möör enkeld um het winnen
En dan zet hee heel resoluut
bedenkt zich feit’lijk nieet
de wanverteuning da’lijk uut
veurt e nöör KRO-krimi geet
-----
Crödde – dinsdag, 28-06-2016