358. Golden Vondst
Het volgende verhaal is mien verteld
-----
Op diee zundag lei hee op zien bedde te versterven
Nog ene keer deej hee zien beide ogen lös
Toen wenkten hee zien zönne dichterbie te kommen
Hee fluusterden: Jan, mei vandage nog het grös
Toen deej diee olde man veurgoed de ogen dichte
Een vremde lach trok oaver zien uutgeteerde witte geloat
Jan had oaver ‘t meien zien vader nog heel wat te vroagen
Möör Vader was noe dood: hee kreeg hem nieet meer an de proat
-----
Wöörumme mos e goan meien wöör hoaste gin grös meer stond
Zien vader had de laatste tied nooit meer wat an dat veld edoan
Most hee op dat kale veld echt an het meien goan
Hee keek ens oaver het vlak: het was zuver kale grond
Op het midden van de olde bleike zag hee de grote zwerfkei
As deur een magneet wier Jan der hoaste hen etrokken
Hee had het geveul dat hem der ene wol verlokken
um veural möör ens te kieken wat of döör onder lei
Het an de kante rollen van de steen viel toch wel zwöör
Möör hee kreeg het veur mekäre met een dikke bessemstelle
Toen e een putdeksel zag, rinkelden bie hem een belle
In den oorlog hadden zien olders onderdukers döör
-----
Hee greep het deksel van de putte bie twee punten
En lichtten dat met kracht en met een flinke zwei
Toen zag e dat döör oaverdwärs een köperen köker lei
Hee pakten hem deruut: diee zat vol golden munten
Der viel ook nog een brieefken uut: Kom later koker halen
Dan kan ik daarmee bij U mijn schulden afbetalen
En kom ik niet terug, dan ben ik vast uit de tijd
De pot met goud is dan voor U: Bij U sta ik in het krijt
Jan kreeg de troanen in de ogen, wiel hee an Vader dacht
Zien vader had zien hele lèven gewètensvol ewacht
Hee sloat de köker weer veur e diee nöör zien vader bracht
Toen ging e nöör het bedde van zien vader en lei de köker neer
-Vader, diee is veur oe, möör neudig hei’j hem nieet meer
- Ik kan der heel völl’ goeds mee doon, dus ik bedank ’oe zeer-
-----
Crödde – Zundag, 12 juni 2016
