346. Het blood krup ...

> Categorie: Literatuur Gepubliceerd: zaterdag 21 mei 2016

mien laatste värskes he’k

nog weer ens deur elèzen

toen bleek mien dat ik slechts

een schoolmeester kan wèzen

en ik verzinne vaak

wat leuks nöör mien idee

en dat völt achterof

dan helemoal nieet mee

ik wille altied möör

de dinger ook verklören

en dat is nooit veranderd

bie het klimmen van de jören

en as ik dan heel gezellig

gewoon wat leuks wil zeggen

slup het ter toch weer in

dat ik het uut goa leggen

meschiens bint ter wel luu

diee het heel goed könt verstoan

dat het blood noe éénmoal krup

wöörof het nieet kan goan

en potveredriee veur ik dat heb ezegd

heb ik het veur diee tied

toch al weer uutelegd

-----

Crödde – Zoaterdag, 21-05-2016