345. Veurbeeld Menselijkheid

> Categorie: Literatuur Gepubliceerd: vrijdag 20 mei 2016

Vriedag, 20 mei 2016

-----

vanmärgen las ik in mien krante

een column oaver ‘Menselijkheid’

deur Renate Wennemars eschreven

portret terbie: een frisse meid

-----

’t ging oaver onze vluchtelingen

diee straks in Roalte wordt verwacht

dat wekt in Roalte een boel weerstand

van Roaltenären nieet edacht

-----

Renate, Wedergeboren za’k möör zeggen

schrif dat Henk Aa , een vent met lef

um de vluchtelingen Nederlands te leren

wel honderdduzend euro gef

-----

Henk löt zien centen riekelijk streumen

oaver het dorre ontheemden land

veur hem geldt enkeld nomen est omen

hulplozen helpen met gulle hand

-----

dus Roaltenären, loat oew leiden

deur oew geleuf en oew verstand

en deur het veurbeeld van Henk Aa

en reikt oew medemens de hand

-----

stoa achter hem en steun massaal

een medemenselijk beleid

en volg Henk noa en wèès ook eigens

een juust veurbeeld van menselijkheid

-----

Crödde van Niessel – Vriedag, 20 mei 2016