343. Dooien en Vrieezen

> Categorie: Literatuur Gepubliceerd: dinsdag 17 mei 2016

Veur Douwe Bob en Max Verstappen

Heel Nederland kent Douwe Bob

en oke Max Verstappen

De enend kan goed kwelen

de anderen het gas intrappen

Douwe Bob diee zong in Zweden

en Max diee reej in Spanje

Ze vochten beiden veur één kleur

en dat was dus Oranje

Oranje dat is Nederland

dat weet het kleinste kind

En alle Nederlanders bint

Oranje goed gezind

Miljoenen hebt noe plotseling

dan ook verstand van zingen

Douwe Bob dat is de besten

Diee mot gewoonweg winnen

En Max Verstappen kan zoo virtuoos

het gaspedaal intrappen

Diee wint de Grote Pries van Spanje

wat een ieder wel zal snappen

-----

In Zweden bleek veur Douwe Bob

gin ere te behalen

In de finale wier e ellufde

en dat was èven balen

In Spanje won Verstappen

veur het eerst de Grote Pries

Toen ik dat dus veurspelden

vonden ze mien heel onwies

Ik weet wel hee is nog een kind

döörvan hef e gensgin hinder

want de eerste pannekoke is

altied nog veur de kinder

Al bin iej nog zoo goed

het is winnen of verlieezen

Ook as het lente is

kan het dooien möör ook vrieezen

En jonge Douwe Bob

en nog jonger Max Verstappen

hebt Nederland völ goeds edoan

wat beiden wel zölt snappen

-----

Crödde – Dinsdag noa het pinksterweekende 17-05-2016