342. KLANKBORDEN
An Jos van Rey, politicus uut Roermond
-----
Vrogger most ik nöör de kerke
Döör had ik gin hekel an
Een goeie prèke van de domeneer
joa, döör hield ik echt wel van
Boaven de prèèkstool zat het galmbord
wat ook klankbord wördt eheten
Dat döör een werkwoord bie heurt
heb ik vrogger nooit eweten
Ik heurden het laatst op de teevee
van een groot politicus
wereldbereumd in heel Roermond
wat echt nieet mis is dus
Klankborden doo’j met iemand
geïnteresseerd in een gesprek
Iej proat dan zoo wat hen en weer
Da’s helemoal nieet zoo gek
Wat anders wördt het as het geet
oaver geheime zaken
Döör hef oew klankbord niks
möör dan ook kats niks mee te maken
En dat is wat de grote man
met zien klankbord hef edoan
en döörumme mot diee keerl
noe veur de rechter stoan
een dinger nöör het burgemeestersschap
hef e geheimen ‘eklankbord’
En dat noe is wat diee politicus
kwoalijk enommen wordt
Hee is heel slim, want hee bedacht
‘klankborden’ zoo, ter plekke
Veur hem was het een verzachting
van het verboajen ‘lekken’
Hee dacht, ’t Oo Em hef dat nieet deur
Dat had e lekker mis
Hee hef elekt en dat is fout
Da’s een ding dat zeker is
Möör Jos hef één ding toch edoan
wöördeur ‘k hem priezen kan
onze werkwoordenschat vergroot
En kiek, döör hold ik van
Noe steet Meneer dus veur ’t gericht
Veur vermeend corrupt gedrag
umdat wat hee klankborden neumt
in Nederland nieet mag
En dat dit zoo gebeurt
is helemoal nieet slecht
En wat of wiej der ook van denkt
de rechters diee sprèèkt recht
Echt!
-----
Crödde – Pinksteren, 15 mei 2016
