338. GROOT AGNOST

> Categorie: Literatuur Gepubliceerd: maandag 09 mei 2016

Iej bint een heel groot filosoof, zoo wier mien ens verteld

Ik mosse härdop lachen, wiesgerig bin ik gin held

Döör he’k een heel mooi veurbeeld van en dat vertel ik noe

Dan heur iej van mieneigen da’k nooit wete wat of hoe

----

Een paertjen pimpelmeeskes had bliekböör een heel vol nest

Ze vloagen of en an, dejen dus heel hun best

hun jongen groot te brengen in het kastjen achter ons huus

As ik mien oor te luusteren lei, heurden ik fuus-fuus … fuus-fuus …

-----

Het was op vriedagmärn, noa hemelvaerts- en vrieheidsdag

Ik zatte buten, keke rond, ik weet nieet wat ik zag

Op de règenmèter kwam een meesken zitten, een rupsken in de bek

Hee vloag het kastjen in en uut en ik dache nog, wat gek

want hee ging weer zitten met het rupsken hangend uut zien bek

Ik wisse nieet wat of ter was, möör ik heurden nieet meer het gefuus

Ik dache: de jongen diee bint uutevloagen, hee treft ze nieet meer thuus

Möör het kon ook wel anders wèèn, ik wist nieet hoe of wat

Ik wier steeds ongeruster en op het laatst was ik het zat

Ik bin nöör het kastjen too egoan, ik bin der in goan kieken

Toen wier ik stille van verdrieet: der leien wel tien lieken

Heel kaal en klein en zielig, ene bewoag nog wat

Ik wete nieet wat of diee dierkes veur zieekte heb ehad

Ik heb het nest elöögd, weerummegeven an Modertjen Natuur

Toen bi’k ter bie goan zitten, toch wel ärg oaverstuur

Ik wisse nieet wat ik denken mos en wa’k hierop mos zeggen

Ik snappen zelfs agensnieet da’k mien hierbie neer mos leggen

Ik wete mien nooit road met dood, met onrecht, oorlog, en zoo meer

Ik weet het nieet, ikweet het nieet, zei ik ook disse keer

Ik bin volstrekt gin filosoof, kan nieet wiesgerig denken

En butendat, ‘t gebeuren um mien hen wil ik mien andacht schenken

Ik bin gin filosoof, de weetnieetkunde is mien op ‘t lief eschreven

Wat um mien hen gebeurt, hef denken kats verdreven

wiel metafysisch denken een boel zinloze meujte kost

Ik bin het tegendeel van filosoof ! Ik bin een groot agnost!

-----

O joa, het mooie nösken he’k weerummezet, noa da’k het had verschoond

Meschiens word ik döörveur deur dit paer met een tweede brood beloond

-----

Crödde – Moandag, 9 mei 2016