315.Meneer en de kiekjuffrouw

> Categorie: Literatuur Gepubliceerd: donderdag 17 maart 2016

Hoaste tachtig jöör elejen, as ik nog een jonge wazze

zat ik op de leeg’re schole nog möör in de derde klasse

Negentienhonderd zesendertig was het jöör, ‘k weet het nog best

Wiej hadden een hele beste meester; hee is heel goed veur ons ewest

-----

“Meneer”, zoo neumden wiej de meester: dat was in Dèventer gewoon

Hee wier döör vast nieet bèter van: kreeg hetzelde lege loon

Een jonge deern hielp in de klasse; zee was nog kwekelinge

Zee gaf ook les en disse kiekjuffrouw kon härtstikke goed zingen

“In ‘t groene dal, in ’t stille dal”, zong ik met oavergave

En bie “Hoog op de gele wagen” liet ik härd “de kleppers” draven

-----

Meneer was kats verlieefd op haer, dat kon iej zoo wel märken

Toch bleef zien seksueel gedrag volstrekt binnen de pärken

Möör één keer heb ik hem betrapt op iets wat echt nieet kon

Dat was toen hun verlieefdheid het van de härsens won

Ik keke deur het rèèmken in het löge schoollokaal

En wat ik döör toen zagge, dat was echt nieet meer normaal

Ze stonden boek an boek, de ärmen um mekaer’ eslagen

Toen beurden hee haer op en ging haer nöör een toafel dragen

En wat ik toen ezieen heb, döör za’k möör oaver zwiegen

Van dik holt zaagden zee toen planken: zee zol der wat van kriegen

En verder steet mien het beschrieven van dit schouwtoneel echt nieet zoo vrie

Want zol ik oe dat noe vertellen, dan is dat heuse, joa zeker, pornografie

-----

Noe, tachtig jören later, heb ik het Crödde deurverteld

Diee hef veur mien toen uutgebreid alles op riem esteld

De kiekjuffrouw heb ik nog vaak ezieen met mien aerdige meneer

Zee bleven noa hun leerschooltied bie mekäre in de leer

Zee kregen zeuven kinder, ik weet heel goed hoe of dat ging

Dat ging met lieefde van geweld in innige vereniging

En niks heb ik eloagen, ’t is alles wöör wöörachtig

Zoo wöör as ik noe old bin en dat is achtentachtig

-----

Diepenveen, lentemoand 2016