299. Veurdracht, Vertelkunst, Goed Gesprek

> Categorie: Literatuur Gepubliceerd: maandag 25 januari 2016

Veurdragen en vertellen heb ik altied graag edoan

‘k Begon dermee toen ik nog möör een jöör of dertien was

Ik zag toen een mooi värs oaver “Bram de dichter” stoan

En ik dachte metene: Dat kump mien goed van pas

Ik heb dat Achterhookse riem ens heel goed bestudeerd

En wat gin Dèèmters was döörin heel meujzaam ummezet

En döörnoa diee pracht veurdracht kats uut de kop eleerd

En toen dat allemoal’ gebeurd was, toen begon veur mien de pret

De “Knapenvereniging” diee hield een reciteerwedstried

Ik was döör lid van dus en ik besloat um deel te nemmen

Een hele olde pette van mien vader nam ik mee uut de vergangen tied

Toen ging ik nöör de wedstried en dacht: Noe zui’w ’t toch wöörachtig hemmen

En toen ik an de beurte was, zett’n ik de pette op mien kop

En ‘k gaf mien een stuk Dèèmters vort, noe mensen het was nieet mis

‘k Gavve de andere reciteerders deur mien spel onmundig klop

‘k Wonne de eerste pries toen en dat was gin kattepis

Ik ginge deur met riemen zeggen, ook in het Nederlands

Ik zatte in diee dagen al op de haabeejes

“Een Nieuwe Bundel” lazen wiej, al was diee tweedehands

De gedichten diee derin stonden, diee wazzen èven best

“Een vers dat als een nachtkaars uitgaat” van heer E. Laurillard

De stemmen van de mensen döör nam ik heel stevig onder ‘t mes

De negen mensen diee ik noadeej, zee klonken heel ampärt

En ook diee veurdracht deej ik völle bèteder nog as de rest

Ik dache: Weet iej wat? ‘k Goa bie het leger onderwies

Want döör kan ik altied veurdrachten doon en mooi vertellen

En dat vindt al diee jonge kinder vast ageenieet zoo onwies

dus trok ik noa de haabeejes bie de Kweekschole an de belle

Döör wollen ze mien graag hebben en ik wier een echte Meester

En da’k bin toen mien hele lèven möör heel gerust ebleven

Veurdragen en vertellen en lekker nölen wier mien lèven

En dat hef mien töt vandage antoo enkeld plezier egeven

Veur heel goed onderwies en orde holden volgt noe driee tippen

Veurdracht, vertelkunst, goed gesprek: ze hangt oe an de lippen

En meschiens zekt ze dan tegen oe heel zachtjes met hun allen

’t Is hier zoo stille, Meester of Juf, da’j een speld könt heuren vallen

-----

Moandag, 25 januäri 2016.