199 Ofgank
Op de eenendertigsten van één
was het gedichtendag
Een wedstried was ter uuteschreven
hetgeen natuurlijk mag
Het thema was dit jöör: muziek
veur Dèventer en zien umgèving
Döör kies iej dan een motiefken bie
wat kump uut oew belèving
Der dejen der wel tachtig mee
veurwóór een heleboel
Een ieder deej zien eigen ding
veur het dichterlijke doel
Op één twee dertien stond
de uutslag in de krante
De winnaer was ‘nobody’s wife’
van een frisse jonge tante
Möör veur ik disse uutslag vond
most ik heel de krante deur
veur een lullig klein verslagjen
Döör he’k gin strèèkblad veur
Gin foto niks gin huldewoord
veur disse frisse dieerne
Zon ofgank veur ‘De Stentor’
belèèf ik toch nieet geerne
Wat is ter noe nog oaver
van dat mooie gave blad
dat ens het dudelijk stempel
“Deventer Dagblad” hef ehad
1-2-2013 Crödde van Niessel
