100 Met de trein
Al jören hebt ze een treinabonnement, speciaal veur oldere mensen, met korting van veertig töt vieftig procent op de retours en enkele reizen. Butendat zit ter zeuven keer vriej reizen bie, zes kaertjes, veur iedere twee moand ene, en de zeuvenden diee het hele abonnementsjöör geldig is. Bie hun löp dat jöör van 20-12 töt 20-12. Vriej reizen mot altied op het laatst gebeuren, meestal dus op de negentienden of de twintigsten. Noe bint ze dan ens een keer op de zestienden, juni de zestienden wel te verstoan, een woensdag. Gerrit wil altied zoo verre meugelijk, Ali wil het lieefste nöör steden met beheurlijke musea. Dat hef ze oavereholden uut de tied dat ter bie het abonnement oke een museumjöörkaerte inbegrepen was en diee was toen vanzellufsprèkend gratis en veur niks. Der wordt altied reizen uutezocht wöörbie ze zoo weinig meugelijk hooft oaver te stappen. Hee hef het lieefst dat ter helemoale nieet oaverestapt hof te worden. Hee herinnert zich dat ze ens in Olst opestapt bint en töt Roosendaal bint blieven zitten. Ze bint döör uutestapt, dat was um een uur of twalef en toen bint ze in de stationsrestauratie goan middagèten, lekkere patat met kip. Döörnoa hebt ze de trein weerumme enommen töt Olst. Um een uur of vieve ’s middes wären ze al weer thuus. Dat was veur hem nog ens een mooi dagjen uut en … Ali had met haer stieve en pienelijke ledemoaten weinig hoven te lopen.
Um hallef negen pakt hee de auto en rit hem veur. Dan wandelt Ali nöör de wagen en um tien oaver hallef riejt ze. Dan rit e nöör Olst. Döör is pärkeren bie het station gratis en … ze hooft möör enkele tientallen meters te lopen. Op de computer hef e op ‘9292ov’ al ezieen dat ze de intercity van een paer minuten oaver negen pakken kunt en dat ze dan dus mooi op tied bint, want ze meugt met hun ‘vriej reizen’ pas um negen uur, noa de spits, opstappen. Bie uutzondering blik de trein möör twee minuten oaver tied! Dat oaverkump hun nieet vake. Möör oponthold is ter döörnoa in Dèventer al! Um een of andere reden of deur een bepoalde eurzaak stoat ze zon tien minuten te wachten en … der kump gin enkele mededeling oaver! Dan sukkelt de trein langzaam nöör Zutphen. Döör wördt pas deur luudsprèkers het bericht deuregeven dat een goederentrein op dit traject veur hun erejen hef. Nou joa, zee hebt de tied. En Ali höldt van krantjes lèzen en ze zöch ter een paer bie mekäre. En hee … hee mag graag nöör buten kieken en genieeten van huuskes, beumkes, bééskes. Loat de spoorwègen möör verder knoojen, het zal hem een zörrig wèèn.
Van Zutphen geet het oaver Dieren, Ärnhem, Elst, Nijmegen, Oss, Den Bosch, Tilburg, nöör Breda. Döör stapt ze oaver op de intercity nöör Dordrecht. Döör komt ze op ‘Spoor 1’ an um hallef ene ongeveer. Dat is een mooie tied um te goan èten! Ali höökt haer linker ärm deur de rechter van hem en samen kuiert ze de prachtige olde binnenstad in. In een old èèthuusken op de hook van twee stroaten net binnen de ‘wallen’ goat ze genieeten in de zunne. Een lekkere omelet geet ter dan altied wel in. “Het lopen valt me dit keer niet mee”, zeg hee tegen Ali. “Wat dacht je van mij dan!?” zucht Ali weerumme. Ze oaverlekt möör nieet verder de lopen, möör noa het èten weerumme te goan nöör het station … . Het is nog nieet eerder gebeurd dat ze beiden op een reis zoovölle lood in de benen hadden. Veur twee uur stoat ze al weer op het station. Hee zut dat Ali härtstikke meu is. Op een bänksken wacht ze op de trein. Um acht oaver hallef driee vertrekt de trein. Der is enkeld tweede klas. Zee hebt een abonnement eerste klas. Möör dat gef nieet, want het is nieet druk. Vanof Geldermalsen riejt ze oaver Utrecht en Zwolle weer nöör Olst. Iets oaver hallef zesse stoat ze döör al weer op het perron. Veur zes uur bint ze thuus, härtstikke meu, möör … voldoan.
Het is veur Gerrit èvenwels de vroage hoe lange of ze dat zoo nog volholden kunt! Hee mot möör dapper blieven autoriejen, want dat budt hun meer meugelijkheden as de trein op den duur. De olderdom kump met …!
