68 Met de noorderzon ...
Koortsig völt Crödde diee oavend in sloap. En hee dreumt. En het gekke is dat hee weet dat e dreumt. Hee zit in de woonkajuit en hee kik de wal op. De postbesteller kump met een brieef de loopplanke op. Hee klopt op de kajuitdeure. Crödde steet op en dut lös. “Even tekenen, Meneer”, zeg de bode en reikt hem een balpenne. Crödde zut dat e tekent veur de ontvangst van een “aangetekend stuk”. Het is een officiële brieef van de ‘Staat der Nederlanden’. Deronder steet dat e ofkomstig is van de ‘Vreemdelingen Verwijderings-Dienst’ (VVD). Noe weet e zeker dat e dreumt, want diee VVD besteet nieet, èvenmin as de ‘Partij Voor Vreemdelingenverwijdering’ (PVV), allewel de namen op hetzelde neerkomt. Hee wringt zieneigen in allerlei bochten um uut de dreumtoostand te kommen, möör hee mot het opgeven. Dan pakt e zien zakmes en snit de umslag lös. Een één keer evollen A-viertjen zit derin de enveloppe. Der stoat driee stempels van het ‘Koninkrijk Konkelfoes’ op. Döör mot e vreselijk umme lachen. Diee staat besteet immers nieet! Het is een verzinsel wat an zien brein ontsproaten is! Hee krig plezier in de dreum. Wat op een nachtmerrie of leek te goan wördt een … humoristische gebeurtenis. Dan les hee de brieef vol andacht härdop: Den Haag, 28 april 2009, Uit de hoofdstad van Pseudonymia, Alterego, ontvingen wij e-mail met de volgende inhoud: “De Staat Pseudonymia heeft ondekt dat de in de IJssel bij Deventer in 1927 in een notedopje aangespoelde zuigeling, thans geheten Crödde van Niessel, de in dat jaar geboren Obelix Menhir is, welke in Schaffhausen door zijn gehuwde moeder Hurix Menhir-Asterix ‘te water’ is gelaten”. Hij kan dus door de Staat der Konkelfoezen als vreemdeling beschouwd worden”.
Op grond van dit bericht deelt de VVD aan U, Crödde van Niessel, mede dat U, hoewel reeds 82 jaren in Konkelfoes aanwezig, als ongewenste vreemdeling aangemerkt dient te worden. De tijd om een ‘verblijfsvergunning’ aan te vragen en via een ‘inburgeringscursus’ Nederlands te mogen leren en Nederlander te worden, is helaas verstreken.
U DIENT ONMIDDELLIJK EN STANTE PEDE “Koninkrijk Konkelfoes” te verlaten. Uw land van herkomst heeft reeds laten weten U met open armen te zullen ontvangen.
De brieef was ondertekend deur de directeur van de VVD, Henk Barak toe Pakse. Döör had Crödde helemoale nooit van eheurd, möör diee dreumname was te leuk um uut de dreum te goan.
Hee geet dus rustig an het werk um … te verdwienen. Hee hef ter trouwens meer as genog van um altied het werk van zien hallefbreur Gerrit op te knappen. Veural met zien curatorschap oaver Hans Smit en de correspondentie met Mineke Muilerman! En dan dat zeuken nöör Tonia. Crödde mot dat töt noe allemoale meedragen. Loat Gerrit zien werk allenig möör doon! In “De Pellerije” hef hee der tied zat veur. Hee hef zien computer nieet meer twee trappen van zestien trejen hoge stoan, want alles is geliekvloers, hee hooft zien tuin nieet meer zelluf te onderholden: dat dut de huusmeester, de heer Timmer, Ali en hee hebt één keer in de wèke een halleve dag huusholdelijke hulpe, wat wil Gerrit nog meer.
Crödde geet härd an het werken an. Hee ruumt de kajuit op, zet alles goed väste, pakt een planke en schildert derop: Vertrokken met de Noorderzon naar Gallië. Dan löp hee de loopplanke of, spiekert de planke op een rikkepööltjen, tekent ter een piele op diee richting Roalte wis en geet weer an boord. Dan stärt e de motor van Sint Joris, schakelt zien navigator in ericht op Apologue-Gallië en vaert vort.
Meu geet e döörnoa achter het stuurrad zitten en höldt een strakke route op Roalte an. Hee hef nieet deur dat e in een dreumloze sloap völt. Dat merkt e pas, as e op vriedag de eersten mei ’s märgens al heel vrog wakker wördt deur de wekker.
