63 De geschiedenis ...
As Crödde weer bie de garage kump um zien auto op te halen, löp hee Fré Weulink tegen het lief. “Oe most ik net hebben”, zeg e, “” Iej hebt in de zestiger jören op de landbouwschole in Dèventer väste Nederlands egeven an Dabwe Wiah uut Liberië”. “Was dat een echte Afrikaanse jonge? Dan heb ik hem gin Nederlands egeven, want hun umgangstaal was Engels of Frans. Diee “leerlingen”, zeien wiej toen nog, hoofden gin Nederlands te volgen. Probeert het ens bie Henk Harmsen; diee hef al diee mannen in de tropische kas ehad”. “Goh Fré, iej hebt gelieke!” En Crödde grip metene zien mobieltjen, zien “keulkaste”, zooas hee altied zeg, want het was al weer een hele ‘antieken’. Èven later hef e Henk al te pakken en hee völt metene met de deure in huus. “Henk, iej hebt in de jören zestig van de veurige eeuw zeker in de kas van de landbouwschole te maken ehad met Dabwe Wiha uut Nigeria”. “Zeker, ik wazze toen min of meer ondergeschikt an Janssen, diee heb iej oke wel ekend, diee toen de scepter zweiden bie het tropische planten-onderwies. Ik hebbe oaver Dabwe nog een hele mooie annekedote. Janssen wol persé dat de leerlingen, welke thuustaal ze ook möör sprakken, alle namen van de planten in het latijn kenden. Dabwe zei toen dat hee het onzin vond um diee allemoale te leren, want dat hee in zien eigen voertaal, Engels, zien tropische planten kenden. Dat schoat Meneer Janssen in het verkeerde kèèlgat. Dabwe is getrouwd met ..eh … Mineke Muilerman uut de Oxerstege, möör dat weet iej wel”.
Henk gef Crödde name en telefoonnummer van een firma in Dèventer diee van de plannen van Vader en Dochter Dabwe völle meer ofweet. Crödde belt metene noa Henk bedankt te hebben. Hee krig een vrindelijke vrouwe an de ‘droad’. De dochter van Dabwe heet Tonia, heurt hee noe, Tonia Dabwe. Zee wönt al jören in Dèventer. Mineke, haer moder, hebt ze noa Kerstoavend negenentachtig, toen ze oavervallen bint, nooit weerevonden. Dabwe en Tonia bint noa hun vlucht op diee oavend völle later nöör ‘huus’ weerekeerd. Zee hebt hun werk veur hun volk veurtezet. Tonia wil dat veural oke um haer Moder te eren en natuurlijk haer Vader tèvens. Zee wil dit jöör een stichting in het lèven ropen diee de name van haer Moder drög, zooiets as “Mineke Foundation”. Der is namelijk een heleboel geld neudig um in Liberië de economische en maatschappelijke en culturele toostanden te verbèteren!
Noa dit gesprek vertelt hee an Fré zien bevindingen. Diee gef metene te kennen dat hee heel graag op de heugte eholden worden wil van het wel en wee van Tonia. Crödde beslut Henk Harmsen oke op de heugte te holden.
Hee beslut in gedachten oke de familie Jellema in te lichten: Ingenieur Harco Jellema hef immers noa de eeuwwisseling as directeur van de landbouwschole in Dèventer diee prachtige opleiding veur de tropen motten ofbouwen. Crödde wil dat hee op de heugte is.
“De geschiedenis herhaalt zich”, denkt e, as e in zien auto zit en nöör ‘huus’ rit. “Gust Meester en Guillaume Carpentier zetten huneigen in de zeuventiger jören in veur de ‘verheffing’ van Senegal, Brits Jansen veur Indonesië en noe Tonia Dabwe en Dabwe Wiah bie herhaling veur Liberia!”
Zoo bereikt hee zien Sint Joris! Diee name blif een symbool veur wat hee zelluf dut, denkt e. Gin vechter tegen de bierkaai möör striejer tegen de draak van ärmoede, onwetendheid, geweld, racisme en goat zoo möör deur. En as hee èven later achter zien compjoeter zit, zöch e op ‘koekel’ onder Tonia Dabwe. Der is nog niks oaver haer te vinden. Dan beslut hee haer adres en telefoonnummer te zeuken. Ook diee bint nieet te vinden. Dan möör geduld hebben en ofwachten! Hee is old genog um te weten dat Tonia of deur een ärtikeltjen in de krante of op internet haereigen wel meldt, want de geschiedenis herhaalt zich nieet enkeld, zee schrit oke veurt!
