81 Dinsdag, de 14-den van Louwmoand 2014 - Gazelle of Leeuwin?!
Veur het raam van mien werkkamer langes löp een man in een bruun leren niej glimmend jek. Ik denke metene an Marian Thieme. Zee is in een onzinumvroage ekoazen töt de allermooiste of allerknapste politica van Nederland. De associatie leer – koojen – dieren – PvdD – Marian Thieme is logisch. En natuurlijk is het gin liberaal vruiwken dat bie zon onderzeuk op de eerste plaatse kump: der bint noe één keer meer kieezers diee nieet as wel liberaal bint.
Veur mien blif de vroage wöörumme ‘mooi’ en ‘knap’ bie dit onderzeuk deur mekäre gebruukt wordt. Meugelijk umdat ‘knap’ gebruukt wördt veur de gehele vrouwe: haer uuterlijk en de uutstroaling van het innerlijk. Ik goa der noe ens echt veur zitten um noa te goan wat dat allemoale inhöldt. Möör eerst wat anders mot ik uutzeuken.
Ik koekele op ‘Louwmaand’. Ik vinde de mooiste dinger: ‘louwen’ is ‘looien’. In januäri wier vrogger het leer elooid. November, de slachtmoand was veurbie, de beestenvellen wären verzameld en der kon in het nieje jöör elooid worden. Dat looien was een heel mooi proces. In ‘Wikipedia’, ‘de vrije encyclopedie’, lèès ik dat bie het traditionele leerlooien de dierenvellen eerst evild wordt, lösesnejen zoo gaaf meugelijk, van het beest. Bie dat villen blieft natuurlijk resten vleis op de hand achter. As het runderleer gebruukt worden mot um der bieveurbeeld schonen van te maken, wordt de vellen eerst onthöörd. Dan wordt ze ewèèkt in kalkriek water en dan esmärt. In een donkere, breujerige, vochtige ruumte loat ze de vellen an de butenkante rotting ondergoan deur ze oaver het smärtblok te hangen. Ik denke dat het een vergeliekböör proces is as het roten van vlas: het leer wördt zachte en soepel. De hören kunt ter noe zoo ofeschraapt worden.
Noe denk ik weer an Marian Thieme. Zee is dus de allerknapste of allermooiste vrouwe uut ons politieke damesärsenaal. Ik wil ens èven noagoan wat of dat inhöldt. Zee is dus welevormd, antrekkelijk, bevallig, mooi, vlug van begrip, bekwaam in haer vak, rap, flink, vriej lang, met een heldere blik. Ikzelluf vinde haer onschuldige, grote gazellenogen erg mooi. De tweeden op de lieste is oke wel een ‘lekker dier’, möör Jeanine Hennis-Plasschaert is toch minder de ranke lèvendige springerige gazelle. Zee is meer een leeuwin diee haer scherpe klauwen graag ergens in slöt en op zeuk is nöör een prooi veur haer jongen. Marian hef meer van het herbivore dier wat met alle wèzens in vree lèven wil, Jeanine is de cärnivoor diee op zeuk is nöör prooi. Marian is meer de sociale gemeenschapsvrouwe volgens mien en Jeanine de liberale härde heerseresse. Beide vrouwen bint zooas hun politieke beginselen: de enen dieenend en de ander heersend. En wat is mooier en knapper? Juust! Dieenen!
Het hef mien nooit verwonderd dat de ‘gazelle’ veurvrouwe is van de ‘dierenpärtieje’. Zee beseft dat beesten net mensen bint en da’j ze in hun weerde loaten mot. Dat betèkent veur haer natuurlijk nieet da’j noa de dood van een koo het vel nieet gebruken zollen meugen um der jassen, tassen, schonen of wat dan oke van te maken, möör wel da’j dieren een mensweerdig bestoan mot geven en zee vindt terecht dat het vernederende Carthaagse regiem oaver het dierenwelwèèn verdwienen mot! “En overigens ben ik van mening dat …. !”.
De ‘leeuwin met manen’ lig veurtdurend op de loer um in haer territorium haer kroost te veurzieen van het neudige voedsel. Dat hef veur het eigen volk wat geweldigs! Zee beschermt al heersend. Dat is haer oke an te zieen. Ik vergelieke beide dames nog ens en ik komme töt de conclusie dat Marian in mien brein toch een hogere rang krig as Jeanine: Zee beschermt, möör zee heerst nieet!
Natuurlijk is diee hele rangordebepoaling in knapheid en schoonheid stompzinnig en onzinnig. Möör het hef bie mien toch eleid töt oaverwègingen diee bepoalend bint veur mien politieke inzicht: Ik blieke dichter te stoan bie ‘Gazelle’ as bie ‘Leeuwin’!
