80 Moandag, 13 januäri 2014 - 'Liberalisme ..., niks veur mien!'
De “JOVD” – “Jongerenorganisatie vrijzinnig democraten” hef jungesken Pechtold ekoazen töt, mene ik, de liberaal van het jöör tweeduzend dertiene! Ik bin het volstrekt met ze ens, met diee jongeren. Alexander is nooit boaven de korte ambitieuze jongesbrook uutegreujd. Hee hef volgens mien vanof het deurbrèken van zien bewustwèèn nooit anders edacht dan “Op welke wieze kan ik, Alexander de Grote Pechtold, mien zoo solide meugelijk opwerken töt de rieksten en machtigsten op eerde!” Ik bin der mien van bewust dat ik hem meschiens met diee gedachte schromelijk tekort doo, möör dan merk ik dat wel. Töt nog too bint ter een boel dinger diee mien gelieke geeft met mien gedachten oaver hem.
In de eerste plaatse stelt Pechtold de enkeling centraal. Alexander zet dus Alexander in het middelpunt. Alle ontwikkeling geet um diee enkeling. Bie Pechtold geet het dus altied um Pechtold. Ik wete zeker dat as ik hem dat veurholde, dat hee zeg: “U heeft ongelijk. Bij Pechtold gaat wel alles om Pechtold, maar U vergeet iets. Als U liberaal bent, dient U met het eigen belang mede het algemeen belang! Het individu moet de mensheid verder brengen”.
As het nieet um te hulen was, zol ik in geschater uutbärsten. Ik ziee ze bezig en ik heure ze, diee liberale jungeskes en meikes. Ze bint stuk veur stuk zelluf de rieke man of rieke vrouwe, ze worstelt en reurt zich nöör boaven um het beste uut en in huneigen te halen en de krummelkes bint veur de ärreme Lazarussen um hun hen. Zoovölle meugelijk van een ander halen en zoo weinig meugelijk an de medemense … betalen. En de name van dat gehele Koninkrijk Konkelfoes: “Pärticipatiemaatschappij”. Iederene mag deelhebben an de ärmoede diee deur de märktmaatschappij van de liberalen eschoapen is en wöördeur de kapitalen zich opheupt bie de enkelingen diee het lukt hun verderfelijke liberalisme wöör te maken.
Der schut mien plotseling een veurbeeld te binnen van de werking van het liberale denken: de ‘Olympische Winterspelen’ in Sotsji. Nog dööreloaten het feit of ze diee winterspöllen döör ooit hadden motten holden, is ter het aspect van de menselijke bejegening! Diee lik natuurlijk närns op! De mense diee anders is as de ‘normale’ mense, is nieet in tel! Enkeld döörumme al zol een sporter der egensnieet an mee willen doon. Möör joa, ze skiet en schaatst en bobt en springt veur de krummelkes diee van de liberale Kapitalistische toafel ofvalt, en dat völt dus nog te billijken, möör onze keuning en keuniginne goat ter hen … kieken. En dat nieet enkeld, Ministerpresident Rutte, een politieke figuur, geet ter hen! Poetin zol ons land ens economisch en politiek dwärs zitten kunnen! Ik hebbe heuren verlujen dat Rutte ezegd hebben zol dat hee de homorechten dan mooi op de tribune met Poetin zol kunnen besprèken. Möör dat is natuurlijk onzin. Rutte wil gewoon heel liberaal de Nederlandse Staat veur een snoopreis nöör Rusland loaten opdreien. Ik zol zeggen dat Rutte rustig goan kan, möör nieet as ministerpresident, nee, pärteklier en zellef betalen. En … loat hem döör blieven!
Dit veurbeeld gef wel an dat bie de ‘echte’ liberalen het eigen mes altied van twee kanten sniejen mot: Hoe sniej ik het grootste stuk van het värken veur mieneigen of en de andere kante: Hoe loat ik de minder bedeelden döör zoo weinig meugelijk deel in hebben. Diee anderen mot zoovölle meugelijk meedoon en zoo weinig meugelijk meekriegen. En de ‘ofwiekenden’? Diee mot nieet zeuren! Zee meugt toch tookieken? As … ze de bek möör holdt!
Ik hebbe gelukkig nooit wat ehad met het ‘liberale gedachtengoed’. Mien is eleerd dat de mense nieet allenig op de wereld is en döörumme hadden mien olders meschiens een vriej groot gezin. Dat hef mien eleerd dat alle wèzens op eerde ene grote familie vormt, wöörvan ieder lid recht hef op een goed bestoan en dus op genog èten en drinken, zuver water, een dak boaven het heufd. Dan mo’j gin echte liberaal wèèn … . Feitelijk denk ik: ‘Liberalisme …, niks veur mien!’ Nieet goed? Gedachten bint gelukkig vriej.
