76 Woensdag, 1 januäri 2014 - "Völle heil en zegen... !"
Theo Maassen dut de oldejöörsconference. Ik genieete dervan, möör nieet bie de seksuele penisheugtepunten. Diee hooft veur mien nieet. Mark Rutte zet e trouwens heel scherp neer, veural op zien lèven as ‘leider’ van het land. Toch blif Theo beheurlijk mild. Hee löt an het ende ook dudelijk weten dat e ons, kiekers, allemoale lieef vindt.
Um vief veur twalef is e klöör. Ali en ik telt terugge van vieve töt ene minuut veur het uur nul en de laatste tien seconden telle wiej härdop mee. Op het nulde uur valle wiej mekäre um de hals, bedankt mekäre veur de goeie zörgen van het ofelopen jöör en sprèèkt de hoape uut zoo nog wat jören bie mekäre te kunnen blieven, Ali is immers drieeëntachtig en ik zesentachtig.
Dan geet de tillefoon. Het is onze oldste zönne uut Aduard. Hee brech namens zien gezin de beste wensen veur het net begonnen jöör oaver en ik wense hem veur zien hele gezin “Völle heil en zegen!” Dat is de wens diee mien olders altied bezigden. Onderwiel ik an het oprumen bin en an het ofwassen goa, denk ik döör oaver noa. Een ander mense ‘heil’ wensen, kan in de letterlijke zin niks anders bedujen asda’j diee persoon een goeie gezondheid wenst: heil mot immers ‘heel’ in modern Nederlands wèèn. Dat is een mooie wense. Möör ‘zegen’, wat is dat noe feitelijk precies. ‘Zeuke wiej op’, denk ik en ik pakke een paer woordenboken en ik loate de ofwas èven veur wat het is. ‘Zegen’ blik ‘tèken van beveurrechting te wèèn’, ik zegge veur het gemak möör ‘gunstbewies’. ‘Heil’ mot volgens mien bie de mense van binnenuut kommen, ‘zegen’ kan van butenof kommen: een ander kan mien zegen brengen! Wat een mooie wense is “Völle heil en zegen” feitelijk! Diee hol’ ik ter in.
Tegen één uur ligge wiej in bedde en ik heure niks meer van het geknal. De radiowekker rup mien um kwärt oaver zeuven wakker en ik springe der metene uut. Ik mot ter wel vrog uut, want um tien uur steet de eerste gast al veur de deure en dan wil ik de eerpels veur de boerenkoolstamppot escheld hebben. Ik loate Ali sloapen, ik wekke haer later wel. Eerst èèt ik wat en dan goa ik an het werk met het een en ander. En a’k klöör binne, goa ik kieken hoe of het met Ali is. Diee is net bezig teruut te klimmen. “Ik ben zo klaar”, zeg zee. Ik kieke op mien klöksken. Het is hallef tiene… .
Um tien uur geet de belle. Ik ziee in het kiekvenster dat mien zwoager Gerrit veur de butendeure steet. “Welkom!” en ik drukke op het blauwe knöpken. Ik lope nöör de veurdeure en doo lös. Wiej schudt mekäre de hand. “Gelukkig Nieuwjaar”, zeg Gerrit. “Veel heil en zegen”, kaatse ik weerumme. – “Dat is een mooie wens”, zeg mien geleuvige zwoager. Dan goa we nöör binnen. Ook Ali krig zien heilwensen. Samen drinke wiej koffie. Wiej nemt ter gin öliebolle bie, want oldejöör zit ons alle driee nog dwärs. Wiej proat oaver wat in het veurige jöör achterebleven is en veural oaver … wiee der achterebleven bint! Wiej wordt ter stille van.
Um kwärt veur twalef bint Anneke, Gerrit en Aaldert uut Aduard, Auwerd, ter. Emma en Willemien hebt andere verplichtingen. Ik zette veur Anneke een pötjen thee, Gerrit en Aaldert drinkt zwärte koffie. Een öliebölleken lust ze der wel bie. Aaldert wil graag zien eipet oplajen en vrög um de oplajer van Ali. Effekes later lig zien eipet an de be-oademing. “Dat moet ook allemaal blijven gebeuren in het nieuwe jaar”, zeg e lachend. Oaver ‘heil en zegen’ proate wiej dan allange nieet meer.
Het wördt trouwens nog gezelliger. Azze wiej hutspot, boerenkool met worst en vla of ies egèten hebt, goa ik allenig oprumen en ofwassen. Alle anderen kunt fein met mekäre oaver van alles nölen en ik kan vanuut onze kleine keuken gewoon meedoon. Net as ik klöör bin in de keuken, belt Henk op uut Dinxperlo. Hee wil kommen met Alma zien vrouwe en zien zönne Lukas. As de kinder uut Aduard um driee uur net vertrokken bint, kump Dinxperlo an. Lucas vlög mien um de hals en dat brengt mien zoo al een boel heil en zegen. Ik merke dat het Ali oke zoo geet.
Zoo begint veur mien en Ali het nieje jöör goed en noadat Alma, Henk, Lucas en mien zwoager Gerrit vort bint, denk ik: ‘Veur ons is tweeduzend veertiene met heil en zegen begonnen, loat het veur anderen in disse weulige en woeste wereld oke zoo wèèn!’ Möör dat is natuurlijk een eidele gedachte…: “Völle heil en zegen!” veur iederene.
