58 Woensdag, 23 oktober 2013 - Sinterklaas - Wodan - God - PIETER_BAAS
Sunterkloas vieren doo ik al meer as tachtig jöör. Bewust dan wel te verstoan. Mien olders hebt hun hele huwelijk samen dat kinderfeest met hun kroost evierd. En ik herinnere mien döör uut de jören dertig van de twintigste eeuw nog een heleboel van. Möör ook al het geouwehoer der umhen zit mien nog vers in het brein.
Ik zatte in vierendertig in de eerste klasse van de christelijke “Prinses Julianaschole” an de Enkstroate, noast een “Openbare Lagere School”, de Enkschole. Het christelijk onderwies in Dèventer deej in diee tied nieet mee met de jöörlijkse viering van het sunterkloasfeest veur alle schoolkinder van het legere onderwies in de stad. En dat feest begon altied zoo mooi met de ankomst van Sunterkloas met de stoomboot an de “Welle”. Het was een heuse stoomboot, in mien herinnering van “Van der Schuyt van den Boom Stanfriesrederij”. Ik hebbe dat ontholden, umdat ik het zon mooie name vond. Der stond een enorme schoorsteen op dat schip. Alle kinder van alle scholen in Dèventer gingen met hun eigen klasse um hallef negen kieken nöör de ankomst, behalve … de ‘fienen’, dat wazzen de protestant-christelijken, wiej dus. En wöörumme gingen wiej nieet? Sunterkloas was een ROOMS feest en ROOMSEN wären nog slimmeder as HEIDENEN! Het was dus een HEIDENS feest!
Veur diee viering was een boel geld neudig. Huus an huus wier in de moand november in de hele stad ecollecteerd. Mien olders, diee het met het ‘Christelijk Nationale Schoolbestuur’ in Dèventer helemoale nieet ens wazzen, gavven gewoon een gift bie diee collecte. En bliekböör drong het töt de bestuurderen deur dat de ontevrèden olders hun kinder welens veurgoed van de christelijke schole zollen kunnen halen! … Wiej mochten döörumme op eigen höltjen as kind nöör de ankomst goan kieken, möör … wiej mosten wel um negen uur op schole wèèn, op andere dagen begonnen de lessen um kwärt veur negen! En op schole wier gin Sunterkloas evierd! En dat was gemeen! De roomsen en de rooien vierden het wel, de kleine kinder van de bewaerscholen en de legere klassen van de ‘lagere school’ op schole en de hogere klassen met een toneelveurstelling van “Volksonderwijs” in de Dèventer Schouwburg op het Grote Kerkhof. Pure godsdienstige discriminatie! Möör zukke woorden gebruukten ik toen nog nieet!
Noe “Zwarte Piet als slaaf van Sinterklaas” in disse tied weer an de orde is, zet ik in gedachten alles nog möör ens weer op een rietjen: Zwärte Piet. Piet is een puur christelijke benaming. Simon Petrus is een discipel van Jezus. Hee krig de name Petrus, umdat volgens het biebelverhaal de Heiland hem de steenrots neumt, wöörop hee zien kerke bouwen zal! Wat een eer! Niks slaaf, niks onderdrukking, hooksteen van de christelijke kerke! En dan oke nog zwärt! Petrus is gin witten, de rots en het holdväste in het geleuf is een zwärten!
Zelluf bin ik sinds de jören vieftig Sunterkloas. As ik deur Diepenveen lope en bekenden tegenkomme, klinkt het möör al te vake: “Aah Sinterklaas, ook boodschappen doen?” Zelfs de allerbeste Sinterkloas van Nederland kan volgen Mr. S. Crommelin, diee een groot kloazenkenner was, nieet an mien tippen: “Meneer Kuijk, er is maar één Sinterklaas en dat bent U!” Bram van der Vlugt hef gelukkig diee opmerking nooit eheurd.
Wiee ofbeeldingen van de Germaanse God Wodan ezieen hef, krig wat Sunterkloas betreft al ärgwaan: De Nederlandse Sunterkloas hef niks of weinig te maken met de heilige Nicolaas van Myra, het is gewoon Wodan in een christelijke uutmonstering, dus God! Wodan is een heel old woord. Volgens mien is het als ‘Hwothan’, uut te sprèken as ‘Gwodan’, uut het indogermaans nöör het westen ekommen. In het germaans hef het woord zich esplitst in ‘Gode’ en ‘Wodan’ of ‘Woede’. God en de duvel bint dus in de westerse God verenigd. ‘Donai’ mag dan Joods wèzen, ‘Deo’ of ‘Theo’ Rooms of Christelijk, God is Germaans of Barbaers! God is de man met de lange böörd: God is Sunterkloas, of zooas ik vrogger zei: “Sunterkloas besteet net zoo zeker as God of Wodan, en dat bin ik zelluf!”
Zwärte Piet is dus ver verheven boaven Sunterkloas! En kleine kinder weet dat. Ze bint gek op Pikkie en de pèpernötten en tumtum diee hee rondstreujt. Ze begriept ook niks van de nonsenspreutjes diee oaver hem verteld wordt. Van racisme wilt ze wat ‘Zwarte Piet’ angeet niks heuren. Ze geleuft in Piet en Sunterkloas, oke as ze der nieet meer in geleuft! Donai, Deo, Theo, God, Wodan hebt veur de meeste mensen al lange ofedoan, möör Zwärte Piet lèèft en blif de rots wöörop Sunterkloas zien huus ebouwd hef. En wiee op Piet vertrouwt, hef nieet op zand ebouwd! Hee is gin Pieterman mien KNECHT möör PIETER- - -BAAS !
