57 Zoaterdag, 19 oktober 2013 - Hobbybeurs in "De Schalm"
Noa onze koffie van tien uur goa we der samen hen, nöör Dèventer, nöör “De Schalm” op Borgele. Ik geleuve dat Ali nog gin enkele keer oavereslagen hef zoolange de hobbybeurs döör in oktober eholden wördt. Het is oke veur vrouwen veural een geweldig feest, möör mannen kunt tèvens huneigen döör de ogen uutkieken en ideeën opdoon veur hun lieefhebberiejen. Dat kump mede deurdat mannelijke en vrouwelijke hobby’s al een heleboel jören flink deur mekäre begint te lopen: beide geslachten schildert en tekent, borduurt, maakt prentbrieefkaerten, bouwt veugelhuuskes, spöört kaerten, spöört ofbeeldingen van olde gebouwen, timmert spöllegoed, maakt sieraden van verschillende metaallegeringen, bakt allerlei soorten gebak, werkt met keramiek, breit, höökt, kantklöst.
Op disse beurs ziee’j de meest kunstige, kitscherige, gekunstelde en ongekunstelde dinger liggen en oke vandage kieke ik weer mien ogen uut en Ali oke. Zelluf borduurt zee, “handwerkt” zeg ze, maakt verjöörskaerten en höldt van fotograferen en dus van mooie en ärtistieke foto’s. Ik probere vakwerk, kunst, kitsch en “zundagswerk” te onderscheiden. Zelluf kan ik enkeld een beetjen schrieven, veural in de strèèktaal, dus geet mien andacht veural uut nöör verzamelaers van teksten in en oaver strèèktaal. Disse keer tref ik twee van diee luu an. Ze hebt gin van beiden meer as ik hebbe.
Wiej schoefelt langs de ställekes in de lange gang en in rechter en linker zaal. In de gang tref ik twee goeie bekenden: Jan Rutgers, fotograaf in ruste en Hans Albers, gepensioneerd wiskundedocent. Jan steet ter met zien prachtige fotobook, dat noe al zien zoovölste druk belèèft. Hans is hier meugelijk veur zien fotoverzameling van gebouwen in Dèventer. Een echt Dèventersen is hee, diee alderbastend völle van zien stad höldt, net as ikke trouwens.
Noa ons bezeuk an de gang en de zaaltjes ternoast, gauw we de ziegang in nöör de grote gymzaal. Ook döör hebt heel wat lieefhebbers hun kröömken. Hier is trouwens wat meer loopruumte, zoodat de belangstellenden mekaere wat meer ruumte geven kunt.
Plotseling ziee ik veur mien op oogheugte een prachtig schilderieje hangen. Ik stoa inens op het Grote Kerkhof, op de pärkeerplaatse, in de sneeuw. In het diffuse schemerige licht van een stroatlanteern ris rechts van mien de Dèventer Toren met de heufdingang dööronder op. Links ziee ik de kleine huuskes diee tegen de kerke leunt, en helemoale links kiek ik net nieet de hook umme. Het antikwäriaat van Johan Bouwmeester kan ik nieet zieen. Wel de gebouwen der tegenoaver.
Het dook oademt een Rembrandtieke lichtsfeer deur het vrogwinterse tweeduuster van het tafereel. Het is een impressie van een stille oavend diee oavergoan zal in een ‘stille nacht’.
Ik kieke umlege en in de ogen van de schilderesse: dat weet ik metene deur de maniere wöörop zee mien ankik, met diee blik zooas mien leerling-kleuterleidsters mien vrogger ankeken as ze mien weer ene van hun scheppingen lieten bekieken bie ‘kunstgeschiedenis’. “Herkent U het?” vroagt mien een paer lichtblauwe ogen. – “En of , Grote Kerkhof, bij de hoofdingang van de kerk”. – Ik vroage of ze döör hef ezèten. – “Ja …”. En de rest ontgeet mien. Mevrouw vertelt mien dat ze ooit begonnen is als kleuterleidster. Ze is goan schilderen, tekenleraer eworden, academisch opeleid. Ze hef hier prachtige kunstwerkskes uutestald, het ene al kunstzinniger dan het andere. “Grote Kerkhof in winteravond mag wel duizend euro kosten”, zeg ik. Ze lacht: “Zoveel hoeft U er bij mij niet voor te betalen”. – “Ik zegge dat ik het graag zol willen kopen, möör dat ik der gin plaats veur hebbe!
Dan proate wiej verder oaver het verloren egoane kleuteronderwies en het verdwienen van het “organische” onderwies veur kleuters, wöörin de “chemie” tussen leidster en kleuter zat, zonder toetsen, altied wereldverkennend. Dan geef ik mevrouw een hand. Ik bedanke haer veur het gesprek en “het mooie gezicht op het Grote Kerkhof”.
Ik mag een kaerte van haer pakken. Ik nemme een foto van een lilabonte lelie: prachtig! Dan drei ik de kaerte umme en ik lèze: Mia Rensen - Kunstschilder en Tekenleraar – Voor lessen: Privé individueel – Verkoop van schilderwerk – Verkoop van materialen – Werk in opdracht.
Adres: Suze Groenewegstraat 33 – 6991 ZA Rheden – Tel: 06 25157791.
Website:www.miarensen.nl
Veur haer schrief ik mien gegevens op een kladjen papier. En dan nemme wiej ofscheid. Ik zegge dat zee in de loop van de volgende wèke mot kieken op “Koninkrijk Konkelfoes” 3 57!
Opniej lacht haer blauwe ogen. ‘Kleuterleidsters – Kindekes – Kunst’: Härmonisch Onderwies!
