53 Donderdag, 10 oktober 2013 - Het blif peutjen höken!
A’k um acht uur de radio anzette, heur ik in het niejs dat de fractieveurzitters uut de Tweede Kamer met hun experts en de Minister van Financiën veur de zoovölste keer goat vergaderen um uut de meerderheidscrisis bie wetsveurstellen in de Eerste Kamer te kommen. Der wordt weer verteld dat de Wilders-jonge en de Roemer-volle keerl nieet deelnemt an het oaverleg en dat de altied sissende en giftig slissende Buma-Boy nieet meer mee wil doon. Blieft oaver höörloze en döördeur krachteloze Kale-Samsom, van de PvdA, Halve-Zijlstra van de VVD, veilingmeester Hamertjentik-Pechtold van D66, Zwolse Blauwvinger-Slob van de CU, het slimste jungesken uut de klasse, Kees de jongen-Van der Staaij van de SGP en Rooie-Van Ojik van Groen Links. - Ojee ik, oh nee, ik heure noe pas dat de laatsten de regering oke peutjen wil lichten in de Eerste Kamer.
Jammer veur de regering, möör noe is ter veur eventueel regeringsbeleid möör een hele kleine meerderheid in de Eerste Kamer, en dan mot ter nieet nog ene uut disse onderhandelingen stappen, want dan kunt ze der wel helemoale mee opholden. Het zal mien trouwens een zomerzörg wèèn, want de zomer is toch al oaveregoan in de herfst en märn kump ter een boel nattigheid. Het zeiken van de politiek kan der nog wel bie. “Gerrit, iej mot nieet zoo cynisch denken”, zeg ik in mien eigen. Nee, dat mot ook nieet. Politiek of gin politiek, regering of gin regering, meerderheid in de Kamers of gin meerderheid, het lèven geet gewoon deur! Gelukkig hef gin politicus döör invloed op! Anders zollen ze dat oke nog onmeugelijk maken, behalve Marian Thieme natuurlijk, want diee kump op veur het lèven. De rest van de politici kump enkeld op veur zichzelluf! Nou, meschiens is dat wat oavertrokken edacht, möör toch.
Noe goat de ‘heren’ en een enkele vrouwe weer verder. Ik denke dat ter vandage nog helemoale niks uutkump. Vanoavend zal wel blieken dat ze weer gin scheet opeschoaten bint, möör de strontlucht hangt ter dan wel. Diee ontvlucht ze dan töt märn!
Um negen uur kump onze trouwe hulpe. Ali en zee goat an de huusholding en ik kroepe achter de kompjoeter um an mien ‘eeuwigdurende’ fragmentärische dagbookroman te werken, want ergens meen ik dat mien kleine belèvenissen en mien rechte en kromme meningen dertoo doot, ik wete nieet hoe of dat kump. En um tien uur loat ik mien werk èven rusten, want de koffie is bruun en gedrieeën drinke wiej een paer bakjes. Dan goa we verder met ons werk. Koaken hoof ik vandage nieet, möör döör he’k in de vrogge märn egensnieet an edacht: Ik hebbe toch eerpels escheld. Nou joa, märn bint diee ook nog wel goed, as ze möör helemoale onder water blieft stoan.
Um twalef uur geet Rika vort. Ali en ik èèt een beschuutjen met lekkere keze. Dan goa we effekes in onze luiestolen zitte rusten, nieet te lange, want Ali wil nöör “Huiskes” in Twello um wat nieje kleren te kopen, want ze wil onze economie wat opkrikken.
Um hallef twee goa we eerst bie ‘De Keur’ tanken en dan rieje wiej nöör Twello. Ali slaagt goed bie ‘Huuskes’, zooas altied trouwens. En um een uur of viere binne wiej weer thuus. Um kwärt veur vieve stoa wiej al weer in de hal van “De Pellerieje”. Met zon twintig mensen goa we uut èten bie “Catering & Kookstudio Boschloo” in de Dorpsstroate. Dat doo we geregeld, goed veur de economie in Diepenveen. En wiej zit um vief uur met zien twintigen an toafel. Het èten is as altied veurtreffelijk! Natuurlijk wördt ter oke oaver de regering eproat. Gin mense an toafel hef een goed woord oaver veur “al dat gedoo”. Ik wete nieet meer wiee of het zeg, möör het blif wel bie mien hangen: “Ze doot niks anders as mekäre peutjen höken!” En diee opmerking blif bie mien stèken. En as ik thuus binne en zittend veur de teevee op de dag terugkieke, veul ik dat alle politieke gedoo gin enkele invloed op mien ehad hef vandage! En ik vinde dat logisch, um reden dat politiek doon ‘misdoon’ is: het blif peutjen höken!
