46 Dinsdag, 17 september 2013 - Prinsjesdag... . Wiej kriegt ze nog wel!
As ik um hallef ene de teevee anzette, is de langste theaterveurstelling van het jöör net begonnen. Ali en ik goat ter echt veur zitten. Ginge wiej vrogger met onsbeiden in herfst en winter veur abonnementsveurstellingen nöör de schouwburg in Dèventer, noe binne wiej anewezen op de schöörse drama’s, komedies en kluchten op de teevee. Allewel, de Dèventer Schouwburg hef tegeswoordig mooie programma’s veur mensen van zestig jöör en older. Oke mensen met een beperking kunt bie diee veurstellingen terechte. Zoo is de schouwburg prima toogankelijk veur luu in een rolstool. En veur mensen met een slecht gezichtsvermeugen en geheurgestoorden bint ter speciale veurzieeningen, möör dan mot ze wel van te veuren reserveren. De veurstellingen bint altied op de middag: ze begint um hallef driee en ze duurt meestens töt kwärt veur viere. De mensen hooft möör vieftien euro te betalen um derin te kommen en dan kunt ze hun jassen nog gratis kwiet oke. Um hallef twee meugt de gasten der al in en ze wordt ontvangen met een köpken koffie of thee, l.v..n. oftewel lekker veur niks!
Ik lèze dit allemoale op een folder van de “Deventer Schouwburg”, as ik met één oge nöör de bolle roete zitte te kieken. Ik loate ondertussen Astrid Kerseboom möör kletsen en ik genieete van alle oranje uutedoste figuranten diee oaver het scherm rondhuppelt asof ze bie John Lantings ‘Theater van de Lach’ heurt. Want dat is disse teeveeveurstelling, een klucht van de boavenste planke.
Ik kieke ondertussen watveur aerdige programma’s in onze schouwburg veur 60+ bint. “Theater 60+” gef ons de volgende meugelijkheden: Op 01.10.’13 kunne wiej nöör Gerda Havertong – Fury – try out / Toneel, op 27.11.’13 nöör Jacquelien de Savornin Lohman – Liedvermaak / Cabaret, op 02.02.’14 nöör Danny Malando Kwartet – Festival Het Accordeon / Muziek, op 09.03.’14 nöör Bram van der Vlugt, Jenny Arean e.a / On Golden Pond / Toneel, op 06.04.’14 nöör Bende van Beuving / Klap van de korenmolen / Muziek (met medewerking van de Deventer zangkoren: Vocalized, sh’Boom, Singsation, Perpetuum Mobile en Bouwkunde koor), op 20.05.’14 nöör Marinierskapel der Koninklijke Marine – Theaterconcert / Muziek.
De toogangskaerten kunt online besteld worden ziee ik opwww.deventerschouwburg.nl - . Ik zal der oaver noadenken of Ali en ik van ene of meer van disse prachtige veurstellingen zult goan genieeten: wiej bint al in gin paer jöör meer in de schouwburg ewest. Het wördt hoog tied dit nutteloze teeveegekoekeloer te vervangen deur bètere middagveurstellingen.
Inmiddels is de golden koets veur de ingang van het paleis erejen. De heufdrolspöllers van het stuk “Prinsjesdag” schriejt nöör buten, buugt en niegt veur het horizontale vaandel en stiegt in. De tocht nöör de Ridderzaal begint. An de geestdrift van het juichende en zweiende volk is nieet te merken dat Koninkrijk Konkelfoes in een dieepe economische crisis verkeert, integendeel, het luchtige en kluchtige gedrag van de mensen is een veurbeeld veur de ‘Driee Musketiers’ en grote ‘RAD-dreiers’ Rutte, Asscher, Dijsselbloem, de ministerpresident, de viceministerpresident en de minister van Financiën, diee ik met strakke hypocriete smoelwerken veur in de Ridderzaal ziee zitten. As Willem-Alexander en Maxima binnenkomt, goat alle anwezigen stoan, oke Jetta Klijnsma, al völt haer dat zwöör.
As de keuning neerzig, zig zien vrouwe oke neer en meugt de anderen tèvens zitten goan. Prachtig toneelspel is dat. Dan kump de veurdracht van de keuning. Veur kinderen, olden van dagen, zwakken en zieeken is ter noe niks gin leuks meer an. Veur de werkenden in een betrekking bie een baas is ter wat minder ellende. De bankiers, rieken en ondernemmers komt ter allemoale heel goed of … . Gelukkig is het möör theater! Ons lèven geet gewoon verder! Wiej kunt nieet anders as dom deurdoon! Wiej loat ons gin RAD veur de ogen dreien! Wiej kriegt ze nog wel! Wacht möör of!
