41 Woensdag, 4 september 2013 - Bewègen um fit te blieven... ???
Het is de eerste woensdag van de moand. Wiej goat samen met een boel andere bewoners in ons woningcomplex in de ‘Keizerswaard’ koffiedrinken. Veur ik derhen wandele, kiek ik effen uut het keukenraam. Het blik dat de leden van de bewonerscommissie in de oaverdekte binnentuin de butentoafels al an mekaere eschoaven hebt um met dit heerlijke weer ons lekker buten te kunnen loaten zitten.
Ali en ik goat terhen. Um hallef ellef binne wiej met zon twintig mensen. De koffie, met een keuksken, wördt as altied weer netjes deur de commissieleden ineschonken. Ik kieke ens rond: allemoale blieje gezichten. Het wördt weer echt gezellig.
Ik zitte net met mien buurvrouwe oaver de kinder en kleinkinder te proaten, as Piet Visser, ene van onze commissieleden opsteet: “Dames en heren, mag ik even Uw aandacht! Straks komt er iemand van “De Spil”, U weet wel het “Paramedisch Centrum” hier in de Draaiomsweg, om wat voorlichting te geven over …”. En hee vertelt dat het geet oaver ‘fit blieven deur bewègen’ veur olderen. Het is meschiens gek, möör ik denke metene weer an de ‘Hampelmann’, de lenige kieper bie ‘zaalhandbal’. Zoo slap zol ik bie mien bewègen wel weer willen worden. Natuurlijk ontgeet mien döördeur de rest van Piet zien verhaal.
Zoo um een uur of ellef of ietskes later kump ter een lange heer de binnentuin in. Hee zut ter echt uut as een fysiotherapeut. En het is ‘m! Hee geet gezellig bie ons zitten um een köpken koffie mee te drinken. Dan geet e op een gegeven moment stoan, stelt zieneigen veur als Wouter, en hee vertelt wöör of e veur kump. Helder en klöör leg e uut dadde wiej, juust noe wiej older wordt, in bewèging blieven mot. Het leuke is dat hee döörbie de vergelieking trekt met schoolkinder diee te weinig bewèègt, döördeur vake völs te dikke wordt en … kwoalen oploopt diee vermeden hadden kunnen worden. Der wordt heel andachtig eluusterd en … veur het eerst in lange tied dwaalt mien gedachten nieet of. In gedachten mien eigen oefeningen van iedere dag onder de douche doond, luuster ik. Disse meneer is väste schoolmeester ewest: Hee leg goed uut en hee beujt!
As hee uutesproaken is, kriege wiej gelègenheid vroagen te stellen, wöörop hee weer reageert deur te vertellen welke meugelijkheden hee en “De Spil” te bieeden hebt. Al proatend komme wiej töt een beeld wöörbie onze grote oaverdekte binnentuin eventueel een rol spöllen kan. In dat geval hove wiej de honderd zeuvenentachtig passen nöör “De Spil” nieet te goan.
Wouter zal zörgen dat wiej veur alle vierentwintig woningen folders kriegt. Dööruut kan ekoazen worden wa’j wilt: nordic woalking in groepsverband, fitnesstraining, individuele behandeling en goat zoo möör deur.
Wiej kletst oaver het geheel nog wat noa. Meugelijkheden genog, möör oke meujlijkheden. Veur Ali en mien geldt bieveurbeeld dadde wiej zoo weinig meugelijk tiedgebonden wèzen wilt, dat ik iedere märn veur mien geschikte oefeningen al doo, dat Ali haer hometrainer hef en döörmee zich in conditie probeert te holden. Veur andere luu kunne wiej nieet sprèken.
Afijn, wiej zult wel zieen. Eerst möör ens alle veurlichting ofwachten.
De woorden van Wouter blieft mien onder het koaken bezig holden. As ik bieveurbeeld in groepsverband zol goan lopen, en döör een vaste dag en tied veur zol stoan, zol mien ‘luiheid’ mien nieet tegen kunnen holden, want ik wete veur mieneigen da’k noe te weinig lope! Möör of ik diee tiedsdwang verdragen kan?! Butendat is ter nog wat. Bin ik nog zoo fit, deurda’k nogal wat bewège, of kan ik nog zoo goed bewègen, deurda’k zoo fit binne!? Of … Geet het in ons lèven noe ene keer zooas het geet?! Ik denke trouwens het laatste. Ik heb het ezieen bie olderen um mien hen. Of ze bewoagen of nieet, zee wieren zieek en gingen dood … . Deur hun maniere van lèven konden zee het lèven met gin elle verlengen. Driee vroagtèkens zette ik dus achter ‘Bewègen um fit te blieven’.
