37 Woensdag, 21 augustus 2013 - Een mooie rit..., nieet veur Diederik ...
Veur vandage is ter mooi weer veurspeld: nieet te heite, zunne ofewisseld met wolkenvelden, dreuge. Veur Diederik Samsom, fractieleider van de Peeveedejaa in de Tweede Kamer, zal het wel een kolde dag wèèn met völle wind en een boel règen en of en too een donderschoere. Hee geet immers scheiden! En hee hef veurig jöör bie de vaderlandse verkieezingen zien kinderen nog gebruukt um propaganda veur zien pärtieje te maken! En noe dreigt zien familie uut mekäre te vallen. Ik heb zon idee dat e noe wel een hele anhang verlieezen zal! En ik zal mien möör nieet ofvroagen wat of ter noe feitelijk precies an de hand is, want het antwoord is toch “driee vingers, een pink en een doem”.
Nieet meer an denken. Ali en ik goat vandage weer met de auto op stap. Veur wiej vertrekt, drinke wiej eerst koffie. Um een uur of tiene rieje wiej nöör “De Keur”, tegenwoordig “AVIA”, um de benzinetank vol te loaten gooien. De ongeveer viefendertig liter kost mien tweeënzestig euro. Ik hebbe vierhonderd vier kilometer erejen noa de veurige keer tanken, de motor hef dus ene op ellef en een halleve kilometer edreid. Döör bi’k tevrèden oaver, want ik make de laatste jören gin al te lange ritten meer.
Ik kieze de toeristische weg nöör de ‘Posbank’. Dat is veur mien de Wilhelminabrugge oaver, linksof nöör Wilpe, deur Wilpe richting Voorst, dan rechtsof nöör Klörenbeek. Bie de rotonde in de krusing met de weg Voorst – Apeldoorn goa ik rechtdeur richting Loenen. Dan zeg Ali: “Ik zou wel eens weer naar de ‘Waterval’ in Loenen willen; daar ben ik als meisje eens in gevallen”. Ik antwoorde nieet, möör ik rieje noa het oaverstèken van het Apeldoorns Kanaal richting Loenen en op de krusing met de weg nöör Beekbergen sloa ik rechtsof nöör de ‘Waterval’. Op de pärkeerplaatse döör stoat al aerdig wat auto’s um disse tied, ellef uur. Ik laje de rollator veur Ali uut en wiej loopt nöör de ‘Waterval’. Döör treffe wiej nota bene enkele Diepenveners, onder anderen Gerrit van de Valle en zien vrouwe. Ik ken hem al vanof negentien tweeënvieftig, zien oldere zusken Rieky zat toen in Olst bie mien in de vierde klasse van de legere schole. Dat is dus al eenenzestig jöör elejen: Ali en ik wären net nog nieet etrouwd!
Ali kan nieet weervinden wöör zee lange terugge in de waterval uuteglejen is. Maakt nieet uut.
Wiej goat èven zitten en drinkt sap met een rieetjen. Dan wandele wiej weerumme. Diederik Samsom most ons ens kennen en hier zieen: een old getrouwd stelleken, bienoa eenenzestig jöör deur de wet an mekäre ebonden, nog lieef en leed delend! Ik kriege wöörachtig medeliejen met hem, zien vrouwe en de kinder, veural met dat kind wat licht verstandelijk ‘etroffen’ is.
Azze wiej weer bie de auto bint, wis Ali mien op een fietspompe diee dudelijk veur gebruuk döör is eplaatst. Der hangt een riemken bie: Deze pomp is te leen – Wie hem wegneemt is gemeen … . Wiej mot ter beiden umme lachen. Dan stappe wiej in en riejt verder. Ik rieje noe nöör Eerbeek en dan oaver Dieren, Ellecom, Rheden, De Steeg, en döör rechtsof nöör de ‘Posbank’. In het restaurant döör genieete wiej van onze bitter lemon, kerriesoep en kroketten met brood. Wiej hebt een prachtig uutzicht oaver de ‘Posbank’, “het golvend purper” en de zomerse greune bomen.
Noa onze ‘verpozing’ rieje wiej oaver de Zijpenberg heuveltjen op en heuveltjen of nöör Rozendaal, vandöör richting Oosterbeek, Deelen, Hoenderloo, Otterlo, Garderen, Staverden, Elspeet, Apeldoorn, Teuge. Döör blik een ernstig auto-ongeluk gebeurd te wèèn. Wiej mot ummeriejen langes ‘Vliegveld Teuge’ en oaver Twello. In Diepenveen doo we wat inkopen bie ‘Appie’. Um vief uur binne wiej gezond weer thuus. Het was een mooie rit. Ik denke weer an Diederik, diee zon rit noa eenenzestig jöör huwelijk nooit maken zal … . Ärreme keerl …!
