36 Zundag, 18 augustus 2013 - Oproerkreiers ... Tweehonderd jöör Keuninkriek
Hoe de ‘Veepeejeroo’ der altied weer in slaagt op zundagmärn um tien uur dinger uut de vergangen tied op te rakelen diee gin normaal mense meer interesseert, is mien een roadsel. En dat doot ze dan nota bene noa ‘Vrogge Vogels’ van de ‘VARA’, wat zien beste tied oke al een tiedjen achter de rugge hef! Ik luustere nog wel nöör beide programma’s in de hoape dat de kwaliteit bie beiden nog ens weerkeert; butendat kui’j der tegenwoordig zoo lekker bie indutten.
Het is net asof de makers van zuk soort programma’s enkeld de interesses op natuur-, cultuur- en politiek terrein onder de loep nemt, diee hun eigen elitaire belangstelling hebt: een ander mot ter oke interesse in kriegen. En hoe controversiëler de onderwerpen bint, hoe meer of ze derin gröölt. Vandage mag ik mien bieveurbeeld vanof tien uur bezig holden met Robert Grootveld en Roel van Duijn, een paer oproerkreiers uut de zestiger jören en döörnoa. Net of een man van zesentachtig diee altied moatschappelijk e-interesseerd ewest is, neudig weer herinnerd worden mot an de tied van provo’s, rookverslaafden en antirookmagiërs, kabouters en andere revolutionaire onbenullen. En as ik goed luustere, meen ik te heuren dat de presentatoren van vandage oke nog leuvende woorden hebt veur al diee ongein, uutehaald deur een stelleken ontspoorde pubers. En dan heur ik plotseling oke nog de zalvende zeurderige stemme van Roel, de eeuwige wereldverbèteraer en boer van de kolde grond!
Het gezag proberen te ondergraven deur provocerende acties, veurtdurend de oaverheid zoegen deur diee te beschuldigen van fascistisch gedrag, opstoaken en anwakkeren van vuurtjes, dat heb ik ervären met Robert en Roel. “Nederland is er wel anders door geworden”, heur ik Van Duijn zeggen. Ik beginne härdop te lachen. Natuurlijk wördt ons land iedere periode anders! Deur hun is het wel anders, möör een stuk slechter!
Ik zette de radio uut en ik goa koffie zetten. Ik hebbe gin zin dit gezwam in de ruumte langer an te heuren. Èven later zit Ali en ik gezellig an de Senseo-koffieverkeerd, weinig koffie en een slomp wärreme melk. Ik zet de radio weer an, noe op Drenthe, want ik wete dat ‘Pollings Passie’ der is, met lekkere lichte muziek uut de vieftiger, zestiger en zeuventiger jören, bie mekäre egaerd deur Jans Polling en epresenteerd, mene ik, vanuut zien eigen studio. ‘Mevrouw Polling’, zien vrouwe, mag ook iedere zundag haer keuze doon. Jans brech het geheel op een heel spölse maniere in een mooie Drentse tongval. Hier genieet ik meer van as van het geleuter bie de ‘Veepeejeroo’. Noa de koffie maak ik het middagèten klöör: gekoakte nieje eerpels, sloabeuntjes, gemärineerde kippenpeutjes, nieet van plofkippen, en een griesmèèlpuddinksken met bessensap noa. Wiej smult!
Dan goa we een uurken rusten in onze stolen, ikke noa de ofwas. Tegen driee uur worde wiej wakker. Het eerste wat ik heure, is: “Ik zou weleens weer naar de Lemelerberg willen”. Ik goa grif op diee opmerking in. Noa het èten van een eisjen uut de ‘diepvries’ stappe wiej in de auto en ik rieje oaver Roalte en Lemelerveld nöör de Lemelerberg. Meujzaam klimme wiej nöör de top. In de schitterende zunne licht de pöörs bleujende heide in het ‘Park 1813’ vrolijk op. Het ‘Monument 1813’ met de Nederlandse zittende Leeuw straalt rood het zunnelicht weerumme. Robert en Roel, denk ik, iejluu hebt gelukkig nieet kunnen veurkommen dat ons Keuninkriek dit jöör al tweehonderd jöör besteet! En ik lache härdop. Ali schrikt tervan.
Bie het weerummelopen nöör de auto ontdekke wiej het nieje spölbos. Hier modde wiej hen met onze kleindochter van zeuven! Nemme wiej haer olders oke mee! ‘Lève de Keuning, lève ons Keuninkriek’, roop ik in gedachten en ‘Loat de Roel- en Robertvolgelingen möör verder verroesten!’
Dan rieje wiej oaver Lemele, Luttenberg, Hellendoorn, Nijverdal, de Holterberg, Holten, Bathmen, Colmschoate, Dèventer weerumme nöör huus.
