28 Moandag, 15 juli 2013 - Komkommertied of nieet ...?
Het begint noe toch echt zeumer te worden. Dat is mooi veur al diee kinder en grote mensen diee noe zeumervakantie hebt! As ik um hallef tiene in Diepenveen bie ‘Appie’ Middeldorp in de winkel lope, völt mien op dat het oke weer de tied van de verse ‘Hollandse’ greunte is. Ook nieje eerpels likt ter weer volop, al is ter van te veurten ezegd dat deur de slechte veurzeumer de eerpelopbrengst heel gering is, möör de ‘opperdoezen’ en andere soorten bint volop anwèzig. Sloabeuntjes, sloat, spinazie, andievie, sniejbonen lacht mien allemoale in een boel greune tinten zeumers tegen. En dan nieet te vergèten de komkommer. Döör he’k wat mee, want ik hebbe ens elèzen dat het woord familie is van het Byzantijns-Griekse ‘Kukuon’, wat weer te maken zol hebben met het Griekse ‘Sikuos’, wat weer kump van het Semitische Hebreeuwse ‘Qisjsju’a’. Van diee laatste name zol dan mien achtername ‘Kuijk’ vandan kommen. En noe ik nöör al diee bienoa rechte komkommers in de kisten kieke, ziee ik plotseling mien kromme Vader veur mien: Zien gank was Semitisch, met de voten nöör buten edreid; zien neuze was de neuze van de Israëlieten; zien rugge was krom. Hee leek een ‘komkommer’, spottend ‘kromkrommer’. Binne wiej dan toch ofstammelingen van de tien verdwenen stammen van Israël? Dat vroag ik mien noe weer of! Feitelijk weet ik dieepe in mien härte dat ik ter ene uut de diaspora bin en dat de name ‘Qisjsju’a’ in een boel verschillende varianten met mien veurolders oaver de hele wereld ‘verstrooid’ eworden is.
“Wat sta je te dromen, Gerrit?” heur ik inens achter mien. Ik kieke umme. Harm Menger steet achter mien. Hee is een collega van de Pedagogische Academie uut de beginjören tachtig. Ik vertelle hem dat ik weer een boel verse greunte ziee en vroage hoe of het met zien vrouwe geet. Gelukkig bliekt zeebeiden goed gezond te wèèn. Döör bin ik bliej umme, want ik gun iederene een lang genieeten van het welverdieende pensioen, al wilt ze döör weer wat van ofknabbelen. Pensioenbazen bint net knienen: ze drinkt nieet, möör ze pist oe de zaak wel onder! En ze stinkt oke nog!
Komkommertied. Ik denke al winkelend an een paer grepkes döörmee: Hoe neum iej diee tied as e veurbie is? – Natuurlijk ‘Kwamkwammerverlejen’. – Wat is de verlejen tied van ‘Komkommersloat’? – ‘Kwamkwammersloeg’.
Wat het niejs betreft is ter dit jöör absoluut gin komkommertied! Mien gedachten goat nöör Irak, wöör de anslagen mekäre in ras tempo volgt. Ik denke an Tunesië, wöör de democratie stelselmoatig met geweld de kop wördt inedrukt. Mien gedachten goat nöör Syrië, dat zieneigen stelselmoatig letterlijk an het opbloazen is! Wat mot ik denken van Egypte, wöör de ‘Moslimbroeders’ de democratie de nekke um wilt dreien? Ach, loat ik möör dichter bie huus blieven. Märgriet: Wat hef zee nieet dieepe deur het stof motten goan! Möör … zee hef het ered. Wöördeur? Ik denke deur haer oprechtheid … . Ze hef dudelijk loaten weten hoe zieeken, invaliden, bejöörden behandeld mot worden deur een dieenende oaverheid! Ze hef too-ezegd dat de Gemeente Dèventer op passende wieze zal ummegoan met de taak diee ‘Het Rijk’ an haer hef ‘too-eschoaven’. Märgriet hef het netter ezegd as ik noe denke: Ik sprèke een vernieetigend vonnis oaver de handelwieze van disse regering uut, möör Märgriet blif ‘netjes’.
Hoezoo komkommertied!? Enkeld letterlijk dan toch! ‘Monsters van Loch Ness’, ‘Ufo’s’, ‘Witte Wieven’, ‘Walvis in de Iessel’, ik hebbe der allemoale nog niks van eheurd of elèzen. Wel genieet ik van werkelijk niejs op sport- en ander gebied, ril ik van eerdbèvingen, vlieegrampen, anslagen en andere verschrikkelijke gebeurtenissen. Zol het toch nieet bèter wèèn as het ook figuurlijk komkommertied was?
Ik hebbe mien boodschappen binnen en ik goa ofrèkenen. Gin klante an de kassa … . Vakantietied!
