22 Dinsdag, 25 juni 2013 - Crisisnoodtoostand
A’k um hallef negen veur mien scherm zitte en begin te tikken, verschient ter deur mien raam an de Grutterinkstroate een grote helikopter an de hemel en der klinkt een enorm geronk. Ik wete wat of dat beduudt: Alex hef gister ezegd dat e mien zol kommen halen um op “Eikenhorst” verder te proaten. Hee had ter nog viere uuteneudigd, zei e, möör hee wol nieet vertellen wiee.
Ik trekke mien jas an, geve Ali een kus op haer zilver höör, griepe mien oaverzicht van de inhold van de Grondwet van Nederland, lope derachter uut en wandele deur de Grutterinkstroate, deur de Dreiumsweg nöör de Wètermansweg, deur de Eigen Weg van Nieuwenhuus op nummer 24 en 24A, nöör de wei wöör Alex de heli al an de grond ezet hef. Hee löt mien instappen. Der zit al twee mensen in de gordels. Ik herkenne ze dalijk: Jan Papiesselisse uut Oss, oldfractieveurzitter van de ‘Solidariteitsclub’, ‘SC’ en Norash Amsdiek uut Enschede, wöörvan ik wete dat zee op 16 april 1971 in Grönningen geboren is en dat zee noe ‘Staatssecretaris van Economische Zaken’ is. Zee is van de ‘AP’, ‘Arbeiderspartij’. Ik geve ze beiden een hand en ik wille mien veurstellen. Möör dat blik nieet neudig: Zee kent mien van internet! Ze vindt het beiden leuk zon dialectman te kennen, want diee zal wel bliej wèèn as e Broabants en Stads heurt. Dan ziee ik da’k ter ene oaver het heufd ezieen hebbe: Emilio Romero uut Boxmeer. Hee zit wat verschoalen achter Jan. Hee is noe fractieveurzitter van de ‘SC’ in de Tweede Kamer. “Noe modde wiej enkeld nog Jet Kijlsman halen”, zeg Alex. Ik zegge dat ik haer oke kenne, van vrogger al, toen zee nog völle umging met mien oldste zönne. Zee is noe ‘Staatssecretaris van Sociale Zaken en Werkgelegenheid’. Zee is geboren in Hoogeveen en zal dus wel lekker Drents kunnen ‘neulen’, denk ik bie mien eigen.
Ondertussen genieete wiej allemoale van het mooie gezichte oaver Veluwe, Betuwe, de grote rivieren en het Greune Härte van Nederland. Wiej bint zoo in Den Haag. Alex landt op het Binnenhof. Döör ziee we Jet al zitten in haer makkelijke rolstool. Wat een meid! Ik kenne haer nieet anders as een meiken dat zich altied möör heel meujlijk hef kunnen verplaatsen! Möör iej zieet gewoon dat ze een ‘deurzetter’ is! En wat hef de ‘AP’ an haer een geweldige kracht!
Met de steun van een stok löp zee nöör de heli. Alex helpt haer derin. Zee herkent mien metene uut haer Grönningse tied van zon viefentwintig jöör weerumme of langeder.
Alexander geet weer de lucht in. “Zoo, en noe möör ofwachten of Moder Minima de koffie klöör hef”. “Minima?” vroag ik verwonderd. – “Joa, zee vond Maxima te völle een name diee deej denken an een groep wöör zee nieet bie wenst te heuren. “Ik mot zoo heten, Minima”, zei ze van de wèke. En dat is ook goed, vind ik, want wiej wilt beiden oke lèven van een minimum loon! Minima is in ons ‘bedrief’ um zoo te zeggen onze medewerkersgroep zoo enorm goan uutbreiden, um een veurbeeld te scheppen veur het bedrijfslèven, dadde wiej ons eigen huusholden met weinig geld runnen mot … . Möör wiej klaagt nieet: der bint ter diee het nog völle slechter hebt azze wiej. Butendat, wiej hooft nieet, diee landgenoten mot!”
Èven later zitte wiej met zien vieven bie Minima an de koffie. Ziee schinkt eigenhandig in: “Melk en suiker?” Behalve ik wilt ze allemoale zwärte koffie, zonder suker. Ik zegge dat ik graag ‘koffie verkeerd’ wil. Ik kriege een flinke bak met in een känneken wärreme melk ampärt. Minima trekt zich terugge en Alex begint: “Jan, Jet, Norash, Emilio, Gerrit, Iejluu vormt met zien allen het zoogenaamde ‘Viefmanschap van Nederland’, dat ik zoo dalijk de regeringsmacht in ons keuninkriek oaver loat nemmen. Ik kondige eerst de ‘Crisisnoodtoostand’ of. Ik wete dat ik tegen de Grondwet handele, möör diee stel ik buten werking”. Èven later, ellef uur, zet hee de radio an: “Hier is de Nieuwsdienst van … .”
