12 Zundag, 26 mei 2013 - Wat een trèner!
Ik bemeuje mien de laatste tien jöör nauwelijks meer met voetbal. Dat zal de lèèftied wel wèèn. Allewel, der bint ter zat van boaven de tachtig diee nog fanatiek met bepoalde voetbalclubs meelèèft en dat geldt zeker in Dèventer, de stad van Kowet. Ik bedenke mien da’k ter genog kenne diee nog “vanantieker” eworden bint, noe de “klompenjonges”, zooas mien moder altied zei, weer dreigt te promoveren nöör het walhalla van het Nederlandse profvoetbal en … ik betrappe mien derop da’k opewonden rake noe het bienoa zooverre is dat Kowet promoveert. Twee finalewedstrieden mosten ze spöllen tegen Volendam en de enend zit ter al op: diee hebt ze thuus met driee-nul ewonnen, geleuf ik. En vandage, zundag de zesentwintigsten mei, zal de beslissing vallen: Kowet of Volendam!
Wiel ik dit oaverdenke, binne wiej met de auto op weg nöör Mook, nöör restaurant “Het Zwaantje”. Mien navigatie löt mien der feilloos hen riejen en um tien veur hallef twalef binne wiej der. Het is döör härtstikke druk, want ter bint bliekböör wandel- en fietstochten e-organiseerd vanuut dat restaurant. Wiej kunt nauwelijks een pärkeerplaatse vinden, möör met hulpe van mien nève Kees, zönne van mien breur Nol, diee ons hier uuteneudigd hef veur een buffet dat zien vrouwe Henny en hee geeft, lukt het ergens in de berm nog een plèètsken te vinden. Ik koppele dat metene weer an Kowet. Hun anhang zal in Volendam straks oke wel gin pärkeerplaatsen vinden kunnen. Nöör ik mene, begint de wedstried um hallef driee. Wiej mot hem möör volgen op mobieltjes of i-pads.
Wiej bint met zon viefentwintig mensen bie mekäre, allemoale familie, vrinden en kennissen van Nol en Henny, diee hun verjöördagen mee meugt vieren. Het is een hele gezellige bie-eenkomst. De prachtige sfeer wördt nog versterkt deur het biezundere van de wedstried Volendam-Kowet, want ter bint ter hier een boel uut Dèventer ofkomstig, van noe en … vrogger, toen Kowet nog in de eredivisie spölden.
Het kan mien nieet te gauw hallef driee worden. Tegen kwärt veur driee vroag ik an een nève of diee effekes wil kieken op zien mobieltjen hoe of de stand is. En dan blik dat ik het helemoale mis hebbe: De wedstried is nieet um hallef driee begonnen, möör begint pas um hallef vieve! Ik kriege der inens de zenuwen van. Noe mot ik nog langer wachten op de uutslag van Volendam – Kowet. Möör diee zenuwen bint gauw vort. Der is immers toch niks an te doon.
Um vier uur is het feesken in “Het Zwaantje” of-elopen. Azze wiej nöör huus riejt, hoof ik de radio nieet an te zetten, want diee wedstried begint pas um hallef vieve. Ali hef ter trouwens een hekel an dat ik onder het riejen nöör de radio luustere, want dat leidt te völle of.
Um kwärt veur vieve, in de buurte van Apeldoorn, ofslag Dèventer, zette ik Radio Ene effekes an. Het blik net één-nul veur Volendam eworden te wèèn. Nou ja, dan mot ze der nog driee maken um Kowet te versloan. Dat zal wel nieet lukken! Trouwens, noa een kwärtier al één-nul!? Butendat he’k eheurd dat de Eagles een härtstikke goeie trainer hebt an de jonge Erik ten Hag. Diee zal zien plan wel etrokken hebben … .
Azze wiej um kwärt oaver vieve thuus bint, ziee ik op teletekst dat het nog steeds één-nul is. Ik kieke nöör Nederland Driee en holle noe um de vief minuten contact met teletekst en … het blif één-nul! Kowet is ter! En noe bint ter superlatieven en uutropen te weinig um de club de hemel in te priezen. Möör gelukkig, degenen diee het meeste anspraak maken kan op een andeel in de promotie, de jonge trèner Erik ten Hag, wördt nieet vergèten! Hee hef vanuut een gedegen Hoaksebergse achtergrond dit Dèventer clubken weer op de kaerte ezet. Wat een trèner! Pas een jöör oefenmeester van de Eagles en noe al met ze nöör het heugste niveau. Dat is veur Kowet gin blievertjen, weet ik zeker … . Diee is döör zoo weg. Wat een trèner!!
