2 Dinsdag, 30 april 2013
Döör zitte wiej dan, um negen uur, veur de buis, um het allemoale mee te maken; ofstand van de trone van Beatrix, inhuldiging van Willem-Alexander as keuning en de bevördering van Maxima töt keuniginne. En wiej zieet het allemoale van dichterbie as al diee luu diee noe ergens in Amsterdam bint!
Wiej kiekt onze ogen uut, al is het de derde keer dadde wiej een troonswisseling mee meugt maken: in achtenveertig diee van Wilhelmina nöör Juliana, in tachtig diee van Juliana nöör Beatrix, en noe in tweeduzend dertiene diee van Beatrix nöör Willem-Alexander. Ik vinde het härtstikke leuk dat onze prinseskes, zoo jong as ze bint, dit feestelijke gebeuren liefelijk en lieefelijk mee meugt maken en Ali denkt ter oke zoo over. Op onze lèèftied doo’j trouwens oew beste nieet meer um alles te ontholden wat o’j zieet. Iej ontholdt enkeld möör de dinger diee echt bie oe deurkniept. Ik ziee bieveurbeeld hoe of Beatrix inens weer Trix wördt en Majesteit plotseling weer Bea. Noadat ze haer handtekening ezet hef, is ze metene al haer gezagslasten kwiet! En oke haer ontzaglasten!
Kiek, döör heb ik de heren en dames politiekelingen nooit oaver eheurd, oaver ontzag van de vorst of vorstin veur het volk. En dat is juust het verschil volgens mien tussen republiek en monarchie! De republikein wil de macht an het volk in democratie en de president is het ekoazen gezag oaver diee macht. Zoo ziee ik dat. Möör de Nederlandse monarchie is volgens mien een democratische instelling, diee in alles gelieke is an een republiek, möör … met één veurnaam verschil: onze vorst of vorstinne hef gin macht, hef gin gezag, möör hef ontzag veur het volk wöör hee of zee nieet boaven steet, nee, dernoast. Döörumme kan het onze nieje keuning nieet schèlen hoe of ze hem neumt! Hee wil nieet edieend worden, hee wil dieenen. In diee wetenschap kiek ik met lieefde nöör de gebeurtenissen diee zich veur onze ogen ofspölt. Het Oranjehuus is een heel ampärt Keuningshuus. In de Tweede Wereldoorlog heb ik dat as jonge jonge best opemerkt: het is de bindende kracht van het land.
Midden op de märgen goat Ali en ik het dörp in um oaver de jöörlijkse braderie te wandelen. Ali nemt de rollator mee, ze veult zich altied wat zwiebelig op de benen en zon wagentjen gef steun. Natuurlijk komme wiej de neudige kennissen tegen, zooas Tom Evers, ons olde dorpswachtmeester van de rijkspolitie, noe al jören epensioneerd. Natuurlijk make wiej een gezellig pröötjen. Hans Zoetbrood löp ter met zien vrouwe, Nanny. Hee is een olde collega, onderdirecteur, van de onderwiezersopleidingen wöör ik oke an verbonden wazze. Geert Duteweerd steet op de märkt met zien antikwärische ärtikelen. Hee is een vrind van de “Strèèktaalgroep Dèventer en Umstrèken”, wöör wiej beiden lid van bint, èvenas Willy Hoogstraten trouwens. Diee steet ter oke met zien boken. De “Historische Vereniging Diepenveen” steet ter met een ställeken. De trouwe dieenders Joop Overmaat en Wilbert Derksen vertegenwoordigt döör diee club. En zoo bint ter nog völle meer bekenden. Ene bekik nog ens goed mien draagspeldjen beheurend bie mien ridderschap. “Oranje-Nassau?” vrög e. Ik knikke. “Hei’j dat op de teevee ezieen? Willem-Alexander drög het lint van diee orde”. Ik knikke: “As de verslaggeefster het nieet mee-edeeld had, had ik het oke opemerkt”.
‘s Middes zitte wiej weer veur de buis. Wiej kunt mee genieeten van de inhuldiging. Ik kieke of ik Emmy Strik en Tonia Dabwe ziee zitten, twee van de vief geneudigden uut Dèventer. Hunbeiden ken ik goed, Emmy kent mien trouwens nieet, logisch, want ik hebbe met haer Dickensfestijn nooit rechtstreeks wat te maken ehad. Tonia ken ik des te bèter deur haer ‘Mineke Foundation’ veur Dabwe Town in Liberia en … haer moder, Mineke Muilerman. Veur haer binne wiej Tante Ali en Oom Gerrit. Ik ziee ze gin van beiden.
Het wördt een dag om nooit te vergèten! Wiej maakt alles mee. En … gin wanklank völt!
