GDD LIX Nèvenschikkende Voegwoordelijke Biewoorden

> Categorie: Grammatica Deventer dialect (GDD) Gepubliceerd: woensdag 24 maart 2010

*Der bint zat biewoorden diee as verbindingswoorden bie het nèvenschikkend zinsverband *dienst kunt doon.

 

Ze wordt voegwoordelijke biewoorden eneumd. 

 

Veur het aneneschakelend verband bint bekend: oke (ook), döörbie, èvenzoo (effenzoo), èvenens (effenens), tevens. 

 

Der bint ter oke diee versterkend werkt: butendat, döörboaven, veural, nieet allene (enkeld), möör oke. 

 

Um zaken op een rietjen te zetten, te rangschikken, gebruke wiej in het Dèventers: eerstens (ten eersten), tweedens (ten tweeden) en zoo verder, wieder (wieter), as laatsten, värder, töt slot. 

 

Um te verdelen wordt bieveurbeeld gebruukt: deels … deels, eensdeels … anderdeels, an de ene kante … an de andere kante, noe ens … dan weer, van veurten … van achteren, hier …. döör.

 

Veur het tegenstellend verband bint ter oke een hele rieje biewoorden: dööri(e)ntegen, toch, echter, ondertussen, nieettemin, enkeld, allene (allenig), èvenwels. 

 

Veur het eurzakelijk verband bint ter oke genog: hierdeur, döördeur, döörumme, hierumme, namelijk, trouwens. 

 

*Lange nieet al disse biewoorden doot altied dienst as verbindingswoord!