GDD XXXVI Hulpwerkwoorden van Modaliteit

> Categorie: Grammatica Deventer dialect (GDD) Gepubliceerd: donderdag 14 januari 2010

Hulpwerkwoorden van Modaliteit of Modale Hulpwerkwoorden helpt andere werkwoorden een veurstellingswieze van iets te geven. Ze wordt oke wel **meschienswerkwoorden (KUIJK) eneumd, wiel hun veurstelling tussen wel en nieet ligt.

Der is een dudelijk twiefelmoment. Hier volgt een heel dudelijk veurbeeld: 

Vroage: “Bint dat leren schonen?” Antwoord: “Het mot wel leer wèèn”. Mot helpt wèèn de neudige twiefel uut te drukken. 

Zoo kommen wiej töt de volgende Modale Hulpwerkwoorden: motten, zullen, kunnen, willen, meugen, *lieken, *blieken, *heten, *dunken, *veurkommen. 

Motten – Noe mot iej toch is een keer kommen. 

Zullen – Iej zult wel gelieke hebben. 

Kunnen – Dat kon wel ens gin wolle wèèn.

Willen - Geef mien diee tange; döör wil de reparatie mee lukken

Meugen – Oew vader mag oew zuster wel ens bèter in de gaten holden. 

*Lieken – Dat lik echt gold te wèèn. 

*Blieken – Ze bleek zwanger te wèèn. 

*Heten – Dat heet dan dokter te wèèn. 

*Dunken – Mien dunkt dat volstrekt juust te wèen. 

*Veurkommen – Hem kump dat veur oneerlijk te wèèn. 

*De met een sterretjen an-edude werkwoorden bint koppelwerwoorden, as te wèèn vort-eloaten wördt. In het Dèventers kump dat  vortloaten nauwelijks veur! In disse veurbeelden is te wèèn koppelwekwoord. 

** Meschiens < mag schienen