Onderwiesmensen van de Ravenstroaters
> Categorie: De Ravenstroater / Niesselt
Gepubliceerd: zaterdag 10 oktober 2009
Ja, van een schoolmeester wördt verwacht dat hee les gef, van een leraer nem iej an dat hee doceert en van de professor krieg iej college, ook van de schoolvrouwen.Wat anders kunt diee luu ook nieet as een beetjen kletsen. Vrogger, in de jören dertig, zaggen de mensen nog tegen hun op, vandage an de dag, 2008, al egeels nieet meer. en dan he'k het nog egeenieet ehad oaver de vrouwen onder diee keerls; diee bint enkelt bie hun leerlingen en studenten in tel as ze een mooi snuutjen hebt en onderdoanen um een mooi ciefer veur te geven.Hoe o'k dat allemoale wete? Ik wazze ene van de leerlingen uut de jören dertig en veertig in de veurige eeuw: ik wazze onder andere ….. De Rave. Ene van diee onderwiesmensen met een stuksken kriet tussen doem en wiesvinger van de rechter hand en een anwiesstok um of en too mee te wiezen of te houwen in de linker, …. dat was ik van 1947 tut 1983. En as zodoanig bin ik dan bekend en meschiens wel berucht eworden. O ja, ze kenden mien oke nog as verhaaltjesverteller. En döör hield het mee op. De mensen kunt zich nieet veurstellen, dat zon schoolmeester nog wat anders dut, dat hee hetzelfde dut as zee.Döör goat de verhaaltjes vanof vandage oaver. Iej hadden meschiens wat anders verwacht, nog meer verhaaltjes of gedichten oaver De Rave en zoowat meer, möör iej zit der noast: het wördt tied da'j de onderwiesmensen van de Ravenstroaters wat bèter kennen leert, dan weet iej metene wöörumme het onderwies zon verrotte zaak is. Hoe kom ik der noe op um uutgerèkend noe een of meer dinger oaver onderwiesmensen te vertellen? Dat kump deurdat ik in 1947 …….. collega wiere van een boel frikken diee in de jören dertig les gavven an vrindjes en vrindinnekes van mien uut de Ravenstroate. Wellicht waer iej derbie. Zoo neet, dan hei'j een boel emist: een leraer, onderwiezers, schooljuffrouwen, kwekelingen op de Rijksleerschole en goat zoo möör deur. En de verhalen diee ik oe noe vertellen goa, komt allemoale uut de köker van De Rave (ik dus noe) en mien andere stroatgenoten en … dus uut mien eigen erväringen met dieezelde luu, noa de oorlog, toen zee mien collega’s wazzen. In totaal wazzen dat der nogal een stuk of wat … . Ik geve precies an welke schole hun werkterrein was. Nee, namen van de onderwieskrachten, leerkrachten, neum ik nieet altied, want ik goa gin mensen kwetsen. Too'egeven, wat schoolmeesters en schooljuffrouwen noa hun werktied doot, lig meestal in het verlengde van hun werk: het kinderpeil hoge holden (letterlijk), bielesgeven, schrieven (ze bint immers de enigsten in Nederland diee de spelling en grammatica helemoale beheerst), trainer wèzen bie een sportclub. Hé luusteraer of lèzer, iej bint noe is de enigen diee precies deur hef, wöörumme ik disse verhaaltjes vanof vandage vertelle! Allerlei zaken komt van noe of an de orde. Wiee dat nieet mee wil maken, kan noe nog ofhoaken, möör onthold dan een paer dinger:Iej mist mooie verhalen.Ik lieege vake in kemissie en dat is noe zoo leuk.A’j de leerkracht ekend hebt, weet iej zoo wiee of het is.Dan noe nöör het eerste verhaaltjen en het spölt op het voetbalveld. Diee onderwiezer stond an de Venenschole I. Hee had bie Kowet espöld en hee was oke jeugdtrainer. Veur de oorlog was hee rechtsback en a’j langes hem wollen, skupten diee schoolmeester oe onderuut of intweeën. Hee was rechts en trok zien poot nooit terugge.Bi’j noe niejsgierig genog … ?
