Iesselbad

Feitelijk moch’ ik van mien olders ageenieet lös in de Iessel zwemmen, oke nieet toen ik in het diepe was. Wiej mosten nöör het zwembad dat bie de Schipbrugge an de Wörpkante lei. ‘Iesselbad’ neumden wiej dat. Döör gingen wiej dus hen. De Rave ging meestens nöör het ‘Holterbad’, umdat zien ome döör badmeester was. Allenig nöör het ‘Holterbad’ goan vond hee trouwens nieet fein, der zwommen veurnamelijk deftiger mensen, diee het Iesselbad vies vonden; het lei immers in streumend water, wöör de Dèventer strontsluzen op uutkwammen. De ‘brune weesjonges’, oftewel de härde drollen, dreven dwärs deur de diepe baden en de ondiepen, möör gelukkig nieet zoovölle, want het zwembad lei immers an de Wörpkante.Langes de Lagestroate, onder de spoorbrugge deur, langes de Kapjeswelle, Onder de Linden tut an de Leugenbanke, de Schipbrugge oaver en dan rechtsof liepen wiej der hen. Tegen de Schipbrugge an lei het bad. Het diepe bad lei vlak tegen de wal an. Bie de badhökskes en de jongeskleedruumte, ene grote ruumte, kwam iej deur een loopbrugge oaver te goan, diee bie het höksken van de badmeesters uutkwam. Döör most iej een kaertjen kopen veur een stuver, een dubbeltjen of een kwärtjen. De jonges gingen dan nöör rechts, de meiden nöör links, behalve as het ‘gemengd zwemmen’ was. Links wären dus de hökskes veur de meiden, en diee hadden oke hun eigen baden, pierebad, iets dieper bad en polo-bad, diepe bad; rechts dat alles veur de jonges en mannen. Mien breurs en ik hoofden enkeld möör hun abonnement te loaten zieen. Het hele zomerseizoen konden wiej dagelijks zwemmen veur nauwelijks twee gulden. Ik ginge vake tussen de middag, as het zwemmen veur een kwärtjen was. Dan reej ik met de fietse van schole der noa too. Een meiken bie mien uut de klasse fietsten dan met mien mee, want diee ging oke. In mien herinnering was het dan gemengd zwemmen, möör zeker bin ik döör nieet meer van.Swoenzes en soaters was het smiddes ‘kosteloos’ zwemmen. Dan gingen der een boel kinder uut de Ravenstroate. Umdat het dan niks kostten, was het der härdstikke druk.Ik herinnere mien hoe of ik in het diepe kwam. Ik meldden mien bie de badmeester, diee ’s winters gewoon bie de gemeente werkten in de binnen- of butendienst, Sterken heetten hee, meen ik. Hee deej mien an de liene met een leren band um mien middel. “Springen”, zei hee. Ik spronge. Ik mosse langs de ponton zwemmen, het zwembad dreef op pontons, tut in de hook van het diepe, de hook umme tut an de loopbrugge, keren, weerumme zwemmen tut in de hook, op de rugge dreien, rugzwemmen met de handen in de zied en toen weer langes het trepken uut het water klimmen. Met de liene of mos’ ik weer in het diepe springen en met de wiesvingers boaven water een minuut watertrappen. “Iej bint eslaagd”, zei de badmeester. “Hoe heet iej?” Hee haalden een lucifersdeusken uut zien brookzak, pakten een stumpken potlood uut de borstzak van zien spierwitte oaverhemd en hee schreef mien name op het witte gedeelte van de korte kante. Ik snapten nieet dat het derop kon!Ik was dus in het diepe. “In het Holterbad telt dit nieet”, zei De Rave jaloers. Dat kon mien wat schèlen. Samen zwommen wiej nöör de linkerkante van het diepe. Döör was de lege duukplanke. De Rave leerden mien duken. Toen gingen wiej lekker in het grös liggen zunnen.Toen wiej döörnoa weer in het water doaken, kwam De Rave metene weer nöör mien too zwemmen. “Kiek is wat ik op-edoaken hebbe?” Hee liet mien een wit ballunneken zieen. “Een ballonne?” “Nee, een kepotjen!” Ik snapten der niks van. De Rave lei mien uut wöörof een kepotjen veur dieenden. “Bah, wat voel!” riep ik en ik begon te lachen … . Sjanken …. of lachen … , döör hoofden iej oke bie mien nieet op te wach’enZoo kregen wiej onze seksuele veurlichting: op stroate bie het spöllen, in het water van het zwembad,  in het grote kleedhok döörvan, altied azze wiej met twee of meer jonges wazzen. Met meikes proatten wiej der nieet oaver, diee hadden andere werkwiezen!    

• Vorige
• Volgende