1: Inleiding

Disse verhalen goat allemoale oaver de Ravenstroater. De Ravenstroater is een begrip wöörin dee jongeluu begrepen bint dee in de Ravenstroate hun jeugd hebt belèèfd Ik hebbe disse name verzonnen, toen ik op woensdag, 24 augustus 2007, ‘s oavens um zeuven uur achter de kompjoeter zatte en an disse serie van korte schetskes begonne. Wöörumme doo ik dat, zon name kiezen? Umdat de Ravenstroater echt bestoan hef, ja, hef, want hee lèèft neet meer. Hee is al jong estörven: In 1945 is de Ravenstroate deur de geallieerden plat ebombärdeerd, en biej de wederopbouw is de name veranderd in Moerbeistroate, wat een grote schande is ewest. Döörumme heb ik juust de name Ravenstroater ekoazen. Umdat de Ravenstroater oke ALLE mèkes en jonges samenvat. Elk avontuurken van De Rave , wat steet veur De Ravenstroater is deur een ander belèefd: Ik hebbe ze enkeld in ene figuur ewrongen um gin mense te kwetsen. Buten dat weet degenen dee de blagen uut dee buurte ekend hebt veste nog wel, wee of der emeend wördt in een bepoald verhaal en zoo is dat. Wöörumme ik oaver De Rave juust vertellen wil?Hee wist van de simpelste gebeurtenis een prachtige veurstelling te maken. En dan genoat e döör zoo van, dat de troanen hem oaver de wangen liepen, meestens van het lachen, soms van het hulen. As hee dan uut'elachen was, de troanen met een voele mouwe of'evèègd wazzen, zei e altied weer in keurig Dèventers: "Troanen van sjanken of lachen, döör hof iej neet op te wach’en”. En dan begon e oaverniejs te lachen. Hee kan in dit verband natuurlijk oke een zee wèèn!Sommige dinger dee ik met hem an den Iessel belèèfd hebbe, stoat mien nog zoo bie, da'k mien bie het vertellen hoaste neet goed kan holden. Dat mot ulie mien neet kwoalijk nemmen. Meschiens he'k ze in gedachten nog mooieder emaakt as ze al wären. Beschouwt dan dee zaken möör as verzinsels, dan hoof iej ook neet telkens te denken dadde wie in onze jeugd nog völle crimineler wazzen as de jeugd van tegeswoordig. Want dat wördt toch altied beweerd; dat kui'j neet ontkennen.Ik zal enkeld verhalen vertellen, dee zich langes den Iessel ofspölt, veurnamelijk op de werf, feitelijk de holtwerf, van Stoffels, dee Stoffel heetten zonder S, möör Stoffels eneumd wier, an de Lagestroate, de Perestroate, de Ravenstroate - wat noe de Moerbeistroate is - , de Gemeentewei (bie de spoorbrugge toen), en op de spoorbrugge zelf, en natuurlijk de Lange Zandstroate, de Korte Zandstroate en het Noorderplein.Dudelijk? Ja, ik blieve een schoolmeester. A'j het allemoale nog neet zoo goed begriept, vroag iej mien möör noa, dan leg ik het nog een keer uut. O ja, moch' iej der toch achterkommen uut de verhalen, wee De Rave iedere keer in werkelijkheid is, dan is dat neet zoo erg, um reden zien doaden neet allenig verjöörd bint, hee is der immers al neet meer en kan dus slechts bie volledig verstek vereurdeeld worden.En dan nog wat. Ik hebbe de exclusieve rechten van zien auto-biografie op'ekocht, dus loat ik neet merken, dat een ander de gebeurtenissen uut zien korte lèven op papier geet zetten en uutgeven, want dan bin ik der as de kippen bie um de auteursrechten te innen. En zoo is dat.

• Volgende