57. Gemeenteroad van Dèventer
Noa zien jeugd, tut in de jören tachtig van de twintigste eeuw interesseerden Gerrit de politiek nauwelijks meer of nieet. Het enigste wat hem oaverkoamen was, was dat hee had motten kieezen tussen oapenbaer en biezunder christelijk onderwies. Dat was noe eenmoal een politieke keuze. Diee keuze was in zeuven-en-veertig veur hem heel gemakkelijk. Hee wol dat de kinder onverdeeld nöör de oapenbaere schole gingen, makkelijk zat. Hoewel hee op de christelijke legere schole an de Tabakswal in Dèventer ezèten had, had zien vader hem nöör de Rijks Hogere Burgerschole an de Burgersdiekstroate achter het Molenwiek loaten goan. Toen had hee ontdekt hoe veurnaam of het was dat kinder, en veural jonge kinder tut achttien jöör, op één schooltype bie mekäre zatten. Wat konden zee goed met anderen oaver lèvenszaken proaten en mekäre leren verstoan! Hee had een rieke opleiding ehad döördeur!
Noa zien opleiding an de Kweekschole had hee weinig tied meer ehad zich met politiek en anverwante dinger te bemeujen. Eerst kwam zien periode van militaire dienst en liggende vrèter, toen de tied van sappelen veur zien gezondheid, stoffelijke welwèèn en zien greujende gezin en toen in driee-en-tachtig een tied van oaverspanning.
In diee laatste periode wier in Diepenveen een nieje politieke club op-ericht: ABD, Algemeen Belang Diepenveen. Umdat hee veur het onderwies of-ekeurd was, kreeg hee genog tied zich döörmee te bemeujen. Hee wier mede-oprichter van disse groep.
Toen in 1998 Diepenveen op-enoamen wier in de gemeente Dèventer, werkten Dèventer Belang en ABD samen bie het kiezen van een nieje gemeenteroad. Gerrit was volgens zien club een stemmentrekker en zee wollen hem graag zoo hoog meugelijk op de lieste veur de verkiezingen, möör Gerrit wol op een onverkiesböre plaatse. Dat was plek 12, want ze zollen zeker nieet met meer as vief leden in de road kommen.
Möör … Gerrit wier ekoazen met tweehonderd en achtentwintig veurkeurstemmen en hee was as viefden van hun uut zeuven leden bestoande fractie ekoazen.
Zoo stapten, als iederene wel bekend, Gerrit in januäri 1999 de road binnen. De eerste mededeling diee hee kreeg, was: “U bent de nestor van de Gemeenteraad. Dat wil zeggen dat U in het alleruiterste geval, als alle leiding wegvalt, de “baas” bent.”
Later ontving hee de mededeling dat hee in normale umstandigheden de zesde loco-burgemeester van de gemeente was, noa de wetholders. Döör was hee best trots op: Van liggende vrèter tut loco-burgemeester! Wiee deej hem dat noa!
Hee kreeg as nestor van de road mooie opdrachten, onder anderen de Canadezen en hun gastvrouwen en –mannen op de boot begeleiden nöör Gorssel ter herdenking van de oaverstèèk van de Iesselt in mei 2000, bie de viering van 55 jöör ‘Bevrijding’.
Verder mocht hee allerlei functies bekleden diee met sociale zorg te maken hadden. Op de ‘Vrijwilligersdag’ in een bepoald jöör mocht hee vriewilligerswerk doon op “Sint Jürriën”, an de P.C.Hooftlaan in Dèventer. Oaver dat laatste wier hem evroagd een verhaaltjen te schrieven nöör de werkelijkheid. Hee had dat in zien eigen taal op-esteld. In diee taal dach’ hee noe eenmoal. Döör kon hee niks an doon.
Hee had der heel lange oaver noa motten denken, hoe of hee zien vertelling in zol kleden, want het most toch oke reclame worden veur vriewilligerswerk!
Hee begon wel een keer of driee oaverniej. Toen schreef hee uuteindelijk wat zien härte hem in gaf.
