27. 1985 ... DERBIE ... 1949
> Categorie: De Liggende Vrèters
Gepubliceerd: vrijdag 28 augustus 2009
Kiek, ik ligge nog steeds op mien ligstool. De droad nöör mien lief steet trouwens beheurlijk strak. As diee knapt, bin ik der ewest. Dan bin ik uut mien eigen vort. Dood? Ik veule niks beroerds. Ik hadde mien dat akeliger veuresteld.Der heurt toch een boage in te zitten net as in vlieegertouw! Dat beangstigt mien toch inens. Mien verjöördag wil ik met mien moder, mien kinder en kleinkinder wel graag vieren. Möör dan mot diee droad wat verder vieren. As diee droad knapt, bin ik der ewest. Ik mot wat dichter nöör mien lief too. Ik ziee dat ik bewège, as ik wat afdale. Meneer geet intussen nöör de natuurkenniskaste. Hee haalt döör twee klöskes, een soort löge pleepapierröllekes uut, met een deusken en wat dröödjes. Hee geet veur de klasse stoan. "Zo, nu de proef op de som". Ik begriepe nieet wat hee zegt. "Een van jullie tweeën liegt; wie, dat ga ik hiermee vaststellen." O, wat begint mien härte te bonzen. Hier heb ik nieet op-erèkend.An de deuze zit een droad met een stekker. Meneer stek de stekker in het stopcontact noast het bord."Nu heb ik tien kinderen nodig; die geven elkaar een hand. De twee uiterste kinderen krijgen elk een klosje in hun vrije hand. Dan haal ik dit hendeltje over. En dan voelen al die kinderen een trilling in hun handen, behalve degene die onwaarheid spreekt. Die voelt niets".Meneer neumt de namen op. Ik mot eerst met nog negen anderen."Het hoeft niet meneer, het is van Eddie; ik heb het van hem afgepakt". Bats zeg ik het! Dan goa 'k deur de grond. ... Alle ogen wiest as straffende bliksemstroalen mien kante op. Het roe..oest deur mien kop: "Oaoaoaoaoao..... h oaoaoaoaoaoao.... h" van de hele klasse.Ik wete wat der noe gebeuren geet. Gin prèke, gin woorden. Enkeld kieken. Van Meneer, van alle kinder. Zoo hoge as ik zitte, goa ik weer deur de grond de die-iepte in."Kom toch maar hier", zegt Meneer dan. Met zien tienen geve wie mekäre een hand. Meneer schakelt in. Der geet een vremde tinteling deur mien handen."Dat is de stroom; en het heeft niets met liegen te maken", lacht Meneer gemeen tegen mien. Ik gruwele; zoo lacht een kindermoordenaer! Noa schooltied zet Meneer mien achterop de fietse. Mien kuntjen gleujt al veurdat mien vader mien eslagen hef... ."Haalt 't spaanse rieetjen, snotterdop!"Ik wete wat dat beduudt.Vader nemt mien oaver de kniee. Ik krimpe in mekäre as ik het van hierboaven ziee gebeuren. Zwiep, zwiep, zwiep ... . Het geet van dik holt zage wiej planken."Aaauuw, mien handen!" huul ik."Hol diee der dan nieet veur, rot jonk!"Ik kieke nöör mien kleinzönne, diee nauwelijks opschut tegen de wind in. Hoe zol diee wèèn? Mien zönne zegt der nooit wat oaver. Ik holde mien härte veste. Wat zal zien lèven meujlijk worden vergeleken met het miende! De tookomst is duuster en angstig: woapens, milieuvervoeling, oplössen in de groep. Ach wat, ik hebbe ook motten vechten.
