17. 1985 ... Ringslange. ... 1949
> Categorie: De Liggende Vrèters
Gepubliceerd: woensdag 17 juni 2009
Deur de lange gange löp Gerrit nöör de tuin. Hee wil toch wel graag tuinbaas De Reede sprèken, dee zien vader as begeleider bie de tuinbezigheden op-evolgd is. De tuin is groot. Hee lèvert veur de hele bevolking van het sanatorium de greunte: sloa, andievie, bonen in alle soorten, inmaakgreunte veur de winter, vrogge en late eerpels. En in de werkschure stoat in het keldertjen döörvan de inmaakpotten, diee noe al wel weer evuld wèzen zult. Of is het nog net te vrog in de tied? In dit veurjöör, toen hee in de tuin werken most, stond der een inmaakpot met zeut-zoere augurken; hee had der nog wat uut-ejat. Lekker!Hee zut dat der in de tuin enkele luu loopt te schoffelen. Dat hef hee ook motten doon. Bie de werkschure treft hee mijnheer De Reede, diee bliej is dat hee een pröötjen maken kan. Gerrit krig een hand en een "Iej zeet der goed uut; goat der èven bie zitten". Op de banke bie de pompe goat ze zitten. "Hei'j diee ringslange ooit welis weer ezieen?" vrög Gerrit. Hee denkt an diee märgen dat Woolman en hee bezig wären de paden te schoffelen. Oaver dat breje pad schoaf hun een lange dikke ringslange integen. Zee schoffelden aerzelend deur in zien richting, toch wel wat bange. Toen ze nog zon halve meter van mekäre wazzen, beurden de slange zien kop hoge op en hee ging as het wäre op zien achterlief stoan en begon al werkend met zien spitse tonge geweldig te sissen, van grammieterigheid leek het wel. Woolman en hee wördden zo bange, dat zee beiden de schoffel as spere tegen diee slange richtten. De slange wördden kwoajer en kwoajer. Bloazend en sissend gleej hee op hun too. "Loat dat", heurden zee achter zich. Het was de stemme van De Reede. "An de kante goan veur zon dier, want iejluu loopt op zien pad. Zon ringslange dut niks, möör as iej met een woapen op hem ofkomt, en zeker op zien terrein, wördt hee kwoad, want iej bedreigt hem". Woolman en hee liepen härd het eerpelveld in. Gerrit zag, hoe-of de slange zien kop rustig zakken liet, en zien weg vervolgden. De Reede vertelden hun nog dat ringslangen heel nuttig wären. "Ik bin bliej dat ze in mien tuin komt; ik worde een heleboel ongedierte kwiet"."Joa, hee kwam geregeld weer; hee had zeker een jachtakte veur mien tuin", zegt mijnheer De Reede. "Iej mot trouwens is nöör kamer dertig goan; döör hebt ze tegenswoordig een terrärium, iej weet wel een aquärium veur landdieren. Ze hebt der een ringslangetjen in. Diee heb ik onder dat vochtige puin hen ehaald, achter in de tuin. Döör zatten der meer. Ik hadde der twee mee-enommen, möör ene is der in diee glasbak dood egoan. Iej mot echt is kieken goan. Ze hebt heide en bos in diee grote bak en een waterpärtieje; de oppervlakte is wel anderhalve vierkante meter ".Zo zit ze gezellig in de zunne op de banke met mekäre te proaten oaver de ofkuurtied, diee toch wel heel gezellig was. "Weet iej nog dat iej van oew schoffel een microfoon maakten, gewoon deur hem op de kop te zetten, en dat iej dan Han Hollander noadejen, zoo-as dee Holland-België versloan kon?" Gerrit knikt. "Ziee iej döör dee viere schoffelen? Dee könt best een verzetjen gebruken. Geef nog is een demonstratie?" Gerrit wil dat wel doon. De Reede stek twee vingers in de mond en fluit. De jonges heft de koppen, zieet zien zweiende ärm en slentert noader. Gerrit gef ze allemoale een hand. "Dit is nieet enkeld een schoolmeester, möör ook een cabaretier", zegt De Reede. "Hee geet oeluu een veurstelling geven van een paer minuten. Luuster en genieet van de liggende vrèter Gerrit Kuijk!" …..Lachend ligt Gerrit noe in bedde … . Ali, noast hem, wördt der hoaste wakker van … . Gelukkig dreit ze zich umme, rolt zich op en slöp rustig verder … . Drieeëndertig jöör is hee al met zien meisjen van toen, 1949, getrouwd … !
