16. 1985 ... Roadkamer. ... 1949
> Categorie: De Liggende Vrèters
Gepubliceerd: donderdag 11 juni 2009
Van uterst links nöör uterst rechts is in een volkssanatorium een heel ende. Onder het lopen hef Gerrit heel wat te prakkezeren. In Oog in Al, Centraal Militair Hospitaal, Utrecht, hadden ze hem heel wat ärger te grazen willen nemmen as hee Daan edoan had. Butendat had hee Daan opebiecht wat hee edoan had. Hee mocht nog blie wèèn dat Daan hem gin bedjen etrokken had, dat had hee eerlijk verdieend. Nou ja, te grazen enommen in Oog in Al? Diee officieren hadden ook enkeld edoan wöör de Oaverheid hun veur betaalden. Begin februäri achtenveertig was hee openommen. Een dag later had zich diee gebeurtenisse al veuredoan. Hee was positief, lei achter een scherm. 's Märns noa de koffie heurden hee inens: "Kiekeboe?". Een lieef zusterken, dat hee nieet kenden, keek um het heuksken. "Aankleden", zei zee. "Broek over Uw pyjamabroek en jasje is genoeg". In een rolstool most hee goan zitten. Hee mocht absoluut nieet lopen. Op disse verdieping bleven ze. Ze kwammen bie de Raadkamer. Had döör echt RAADKAMER in heufdletters opestoan, of fantaseerden hee dat noe möör. In ieder geval was hee deur dat woord ewaerschouwd. De zuster klopten. Gin geluud. Ze ging met hem in de wagen nöör binnen.Het leek een kantoorruumte van vief bie zeuven of döörumtrent. Der stonden twee grote bureaus, an vier kanten dervan ko'j zitten in zien herinnering. Hee wier an het heufdende van het ene bureau ezet met de rolstool. Tegenoaver hem zat een grootmajoor, golden balk en golden sterre. Links een kapitein, dree golden sterren. Rechts een secretaresse. Twee golden sterren. Dat mèken was luitenant, too möör. Zee stak de doem tegen hem op en knipeugden. Hee kreeg de indruk dat ze hem steunen wol, zoo van "Hol' oew haaks; ze wilt oe derin luizen!" Toen dacht hee an zien vader; "Denkt derumme, a'j zeek wordt, tekent in dienst dan gin dinger diee tegen oe gebruukt kunt worden". Zol zee dat oke menen? Hee kon dat zich feitelijk nieet veurstellen."We beginnen met de zitting", zei de goldvinke. Hee begon Gerrit allerlei vroagen te stellen vanof begin zeuvenenveertig, toen hee ekeurd was veur de dienst. Oaver zien deurlichting toen, diee gin kwoalijke dinger opelèverd had; oaver zien opkomst; oaver zien opname. De secretaresse tikten zien antwoorden letterlijk op, zonder ook möör nöör haar mesjiene te kieken."Klaar, nu lees ik U dit hele proces-verbaal voor; dan zet U daarna uw handtekening". Hee luusterden andachtig, een paer minuten. Hee wist noe nieet precies meer wat de laatste woorden wären. Het was ongeveer: Ondergetekende verklaart dat hij niet kan bewijzen dat hij zijn ziekte in en door de dienst gekregen heeft. Getekend de ... enzovoort. De kapitein lei hem de verklöring veur."Dit teken ik niet, ik ga mijn eigen graf niet graven", dech hee noe dat hee ezegd hef. "Waarom niet?" Een niedige majoor. "U zult eraan toevoegen dat de leden van de Raadkamer, die en die voornoemd, geen bewijzen hebben gevonden voor besmetting van deze huzaar buiten het dienstverband". Gerrit weet noe nog dat hee dat hoaste letterlijk zoo ezegd hef. Zag hee wat van een glimlachjen bie de secretäresse, en stak zee onderdoems haer doem op?Het zusterken rolden hem weerumme nöör de zaal, toen de majoor an zien veurwaerden voldoan had.Zoo, hee is an het ende op rechts. Hee geet nöör beneden, achteruut, nöör de tuin. Hee mot is èven kieken wiee der noe veur hem in de schoffelploeg ekommen is. Hee zut ze al bezig; ze bint loof an het verbranden. …En zoo goat Gerrit zien gedachten möör deur … , hallef wakker, … half dreumend, met of en too diee Ilona derdeur …. . Een dreumfiguur … !
