14. 1985 ... Uutvinding. ... 1949
> Categorie: De Liggende Vrèters
Gepubliceerd: donderdag 11 juni 2009
"Gerrit, jij moet Hendrik eens leren, hoe je een Turkse knoop van pitriet vlecht; dan kan hij een kluwenmand voor zijn lieve vrouwtje gaan vlechten. Die breit nogal graag. En ik weet niet hoe dat moet", zegt Jan Bennemeer, as de bedden weer op-emaakt bint noa het bedjen trekken en alle zesse weer met hun 'industrie' bezig bint. ----- Hee, Gerrit, geet an het bedde van Hendrik zitten. "Hei'j gebleekt of ongebleekt pitreet?" Hendrik kik hem vroagend an. "Ik zee het al, ongebleekt; da's het goeie. 't Hef ook de juuste dikte, twee komma vief millimeter. Noe maak iej met een hele lange strenge, dissen, twee lussen, zoo. Doot dat möör is". Hendrik pakt ook een slierte en dut het. Hee dut alles noa wat Gerrit veur dut. "Noe nem iej het andere uutende .... vlecht dat tussen de lussen deur .... .Driee moal goa'j langes dezel'de weg ... . Ziee'j wel da'j noe een soort mattenkloppertjen hebt ekregen? Noe hei'j één gat precies in het midden. Döör stèèk iej oew vinger in. Zoo. Dat gat maak iej ietskes groteder. Ziee'j dat de matte noe verticaal geet stoan? Der komt noe twee gaten. Ene onder en ene boaven. Het is noe een bolle met van onder en boaven een gat. Diee bolle is net een dikke höörvlechte, möör dan in een cirkel. Döör stéékt straks de breinoalden deur. Noe goa we an 't mèten an. As de cirkelvormige mande een middelliene krig van veertien centimeter, deursnee dus, wat is dan de umtrek? dree éénzeuvende keer veertiene, Pi moal de middelliene, dat is tweeënveertig plus twee is vierenveertig centimeter. De staken mot ongeveer tweeëneenhalve centimeter van mekaer' stoan. zestien keer twee is tweeëndertig; zestien keer dree is achtenveertig. Iej mot dus vier keer twee staken der deur stèken. Dat wordt zestien uutenden ....". Gerrit löt het allemoale zieen. "Iej hebt noe een èven antal uutenden, dus iej mot vlechten met een dubbele droad, ene een keer rond, dan de ander, diee'j één gat verder instèèkt. "Zoo, noe kui'j verder". --- "Van wiee is diee uutvinding?" --- "Van mien. De Turkse knoop he'k veur den oorlog bie de padvinderieje eleerd. Het is de knup diee oew dasse stevig um de nekke hield. De toopassing veur het pitrieetwerk he'k bedacht toen a'k hier met vlechten bezig wäre. Het zal wel een nieje uutvinding van het rad ewest wèèn, möör ik kan bewiezen dat het eerste model in achtenveertig emaakt is, want, Jan, het model steet bie oe onder in de kaste as veurbeeld". En Gerrit löp nöör Bennemeer zien leg- en hangkaste. Hee greit achter in de hangkaste en höldt de mande in de lucht." ---- Hee krig een geweldig applaus. "Gut, dat wist ik niet meer". Jan löt merken dat hee zich schaamt. "Maar Hendrik kan nu een nieuw model maken en jij hebt een klein cadeautje voor Ali, of handwerkt die niet?" "Joa, zeker wel, jonges", zegt Gerrit; "Vanmergen hef ze mien de knopen nog an de brook eneid, veurda’k nöör Hellendoorn fietsten; mien gulpe stond lös toen ik bie haer langes ginge an de Beestenmärkt in Dèventer; döör hebt haer olders een blomenwinkel met blomisterieje.” En hee löt trots zien dichte gulpe zieen. "En breien dut ze oke". … "Möör noe mot ik vot. Ik wille nog nöör hiernoast, nöör de zoerkoolkeerl, want diee is terugge'vallen. Ik mot hem echt èven wat opbeuren". --- Hendrik vrög benauwd of hee zien model-mande zoolange op tweeëndertig loaten wil, want anders geet hee vaste grove fouten maken. Gerrit geet fluitend of. Olde en nieje moats in het sanatorium bezeuken is heel mooi, möör toch zol hee der nieet graag blieven, denkt hee. Ene deure verder, op drieeëndertig, geet hee binnen zonder kloppen. Met handgeklap wördt hee ontvangen.… Noe, met de handen onder het heufd liggend in zien bedde in 1985, genöt Gerrit opniej van zien Liggende-vrèters-tied … !
