5. Beneuming
> Categorie: De Liggende Vrèters
Gepubliceerd: woensdag 10 juni 2009
Vandage is het zoaterdag. Oaver een paer dagen is Prinses Wilhelmina jörig, bedenkt-e. Hoeneer precies feitelijk? Hee telt het op zien vingers of: "Zundag, moandag, dinsdag, woensdag". Dat is de een-en-dertigsten augustus. Dat is gin Koninginnedag meer, want veurig jöör hef Wilhelmina de scepter an Juliana oaver-edragen. Butendat hef hee 's middes ook gin vrie; dat hef e nooit in Hengforden, want 's zoaters is döör een hele vrieje dag.Hee bukt zich oaver zien fietse; zien achterband is alweer zok, zien veurband trouwens oke. Dat hebt hum wat kleine blagen eflikt. En dan zut hee zien eigen beeld stoan in *)Welsum. Op de fietse van zien vader was hee op een donkere zoaterdag in begin oktober 1947 op weg egoan langes de roadsleden van de Gemeente Olst. Hee had esolliciteerd an de openbäre legere schole in Hengforden. Hee hoapten dat hee dee beneuming kreeg, het was een twee-mansscheultjen. As hee an-esteld wier, was hee de tweede leerkracht döör. Hee maakten dan vieftig procent van het onderwiezersbestand uut en ... as vieftig procent van de mensen an een schole in militaire dienst was, kreeg de laatsten dee op-eropen wier, vriestelling. En hee was goed-ekeurd veur dienst, en hee kon begin november zeuven-en-veertig een oproop verwachten, en hee had der gin ene moer plezier in um Huzaar van Boreel te worden. Het heufd van de Hengfordense schole zol een goed woordjen veur hem doon. Dat was meester Broekhuijzen of Brookhuzen en dat was de vader van Matthie, wöörbie hee in de klasse ezèten had op de HBS in veertig tut vief-en-veertig. Diee jonge had hee met gevöör veur eigen lèven trouwens in het laatste oorlogsjöör an zien huuswerk eholpen, dech hee, wiel hee zien veldkieker uut de fietsetasse haalt, en richting Belvédère löp.Hee was dee dag alle roadsleden langes efietst, eerst noa Wesepe, dan Hoenlo, Olst en tegen zes uur 'soavends stond hee an 'n Iessel. Um zes uur ging het puntjen veur de laatste moal oaver. Het was hoaste donker en wat mistig. Geist, de veerbaas, hees zien fietse in de roeiboot en vaerden oaver. Hee fietsten de diek op en wat linksof, nöör roadslid Schokker. Dee zol zeker op Gerrit stemmen. Met een tasse vol goldrenetten fietsten hee op Dèventer an. Härtstikke duuster. Boem-boem-boem .... Hee reej op de velg. Ofstappen. Gin licht meer. Een lichtend venster bracht redding. Hee belden an. Mocht met fietse en al de hal in. Der was niks meer an te doon. Mismoedig liep hee met de fietse an de hand in het duuster verder. Inens stond hee in het water. De diek was hee of-elopen. Nog goed dat hee het water had heuren kabbelen. Hee liep weerumme, sjokten wel een uur deur. Toen zag hee het silhouet van een boerderieje. Hee herkenden, hee stond weer bie Schokker veur de deure, möör döör stond ook een olde T-Ford. De sjaffeur was appels an het lajen. "Ma'k mee?" vroeg hee.Half oktober viel een an de Rozengaarderweg 43 gerichte beneuming in de busse: 'De Raad der gemeente Olst; Gelezen de voordracht door burgemeester en wethouders van Olst na ingewonnen bericht van het betrokken hoofd der school en na overleg met den inspecteur van het lager onderwijs in de inspectie Deventer; Gelet op de bepalingen der lager onderwijswet 1920; Besluit met ingang van 27 October 1947 te benoemen tot onderwijzer aan de openbare lagere school te Hengforden GERRIT WILLEM KUIJK, geboren 29 September 1927 te Deventer en wonende aldaar. Olst, 13 October 1947. De Raad voornoemd, C. W. Ridder van Rappard, voorzitter, E. H. Pott, Secretaris. *) Ziee ook ‘Bie het Onderwies’.
